ZORO in Aizawl-ah UNO Day pualin hun an hmang

ZORO General Hqrs. chuan nimin Oct. 24, 2022 khan United Nations Organization (UNO) Day pualin Aizawl-a MZP Conference Hall-ah hun an hmang.

UNO Day puala inkhawm an neih hi ZORO Vice President Rohmingthanga Colney chuan kaihruaiin ZORO President Pu R. Sangkawia chuan United Nations Organisation (UNO) chu October 24, 1945-ah khawvel ram hlawm lian ten an din a nih thu sawiin, Permanent Member 5 awmin tun dinhmun ah ram hrang hrang 193 an inthlunzawm mek thu a sawi a. UNO in a tum chu indona avanga hreawm taka awm te chhanchhuah te, khawvel ah remna leh muanna a awm theih nana hmalak te, ram rethei zawk te khaichhuah te, khawvel ram hrang hrang ten inlungrualna tha leh thawhhona tha an neih theih nana hmalak te a ni tlangpui tih a sawi a ni.

ZORO President chuan Zofate hi keimahni-a in awp hrangin hlim takin kan cheng ho thin tih sawiin, tuma awpna hnuaiah kan awm ngai loh thu a sawi a. Hemi kan neih letleh theih nana hma min laksak turin UNO-ah ZORO chuan an thlen thin thu leh ZORO chuan UN Session-ah Palai te intir thinin, he huna hian Zo-Hnam ziarang te pholan thin a nih thu a sawi a, “Kan hnam dinchhuahna tur thahnem tak sawi thin a ni. Hun lo la kal zel turah pawh ZORO chuan UN Session-ah Palai kan la in tir zel dawn a, kan hnam kan dinchhuah theih nan hma kan la zel dawn a ni,” a ti bawk.

Nimin-a UNO Day hmanna ah hian ZORO General Secretary L. Ramdinliana Renthlei chuan an pawl hmalaknaa te tarlangin, “ZORO chu khawvel hmun hrang hranga awm Zofate kan insuihkhawm a, lungrual taka kan awm a, rorelna pakhat hnuaia kan awm theih nana hmalatu pawl a ni a. Zofaten kan chanvo dik tak kan chan theih nana UNO thlengin ke kan lo pen tawh a ni,” a ti a. “Kum thar 2023 kumtirah Zofa Convention chu ZORO chuan a buatsaih dawn a, he huna hian khawvel hmun hrang hrang a Zofate sawmkhawm an ni dawn a. Chin Lushai Conference 1892-a Britsh Sawrkar in keini Zofate thendarh a awm te rorelna pakhat hnuaia kan awmkhawm leh theih na tura a lo ruahman, a tihpuitlin tak loh chu tihpuitling tura ngaihtuah ho turin Zofa Convention hi neih tum a ni,” a ti bawk.

Nimin-a he hun hman hi Political Party hrang hrang hruaitute pawhin hmanpuiin heng Political Party aiawhte hian thu sawina hun an hmang bawk a ni.

Comments

Popular posts from this blog