Thawktute thahnem ngaihna a zarah AYUSH pawimawhna leh tangkaina kan hmu chho zel - Health Minister

Health Minister Dr. R. Lalthangliana chuan Mizoram-ah thawktu tlemte in thahnemngai taka an thawhna a zarah AYUSH pawimawhna leh tangkaina kan hmu chho zel tih sawiin, Mizoram-a ramhmul damdawi tam tak awm te eizawnna atana hmanga siamchhuah neih belh zel dan ngaihtuaha hmalak nise a duh thu a sawi.

Ni 3 awh tur sawrkar laipui-a Ministry of Health & Family Welfare hnuaia Department of AYUSH leh Mizoram sawrkar-a Directorate of AYUSH tangkawpin an buatsaih ‘AROGYA MELA 2022’ hawnna nimin-a Dawrpui Multipurpose Centre, Aizawl-a neih a hmanpuina ah he thu hi sawiin Health Minister chuan ‘AROGYA MELA 2022' in a tum ber chu Mizoram mipuite zingah AYUSH vawrh lar leh ramhmul damdawi, India ram leh Mizoram hmun tam taka awmsa leh natna tihdam nana tha takte Mizo mipuite hnena hrilhhriat leh zirtir a ni tih sawiin, “Mizoram-ah thawktu tlemte in thahnemngai taka an thawhna a zarah AYUSH pawimawhna leh tangkaina kan hmu chho zel a, kum 2019-ah Directorate hrang neiin, tiang chuan hma kan sawn hret hret zel a, amaherawhchu thawktu indaihlohna erawh a nasa,” a ti a. Sawrkar laipui aiawha Mela lo chhim te pawn hriatpui se, indaihlohna hi Ministry-ah ziaka thehluh a nih angin, beng lo var sak turin a ngen nghal bawk.

Health Minister Dr. R. Lalthangliana chuan Mizoram-ah ramhmul damdawi tam tak awm te hi thiamna sang nei ten eizawn nan hmangin, ramhmul damdawi atanga thil siamchhuah neih belh zel dan te ngaihtuahin hma la se a duh thu a sawi a. Thingtlang leh hmun kilkhawr zawkah Doctor leh Medical Staff indaihlohna avang leh damdawi man a sang tial tial avangin mi harsa zawkten damlohna thilah inenkawlna ah harsatna nasa tak an tawk thin a, heng harsatna te hi engemaw chen chu AYUSH leh ramhmul damdawi hmang a sutkian a ni mek a ni tih a sawi a. Chutiang khawpa tangkai AYUSH Science kaltlangin kan ram-a ramhmul damdawi hman thin te chu zirchiang a, uar leh zuala hman tangkai leh humhalh chu a pawimawh hle a ni tih a sawi bawk.

AROGYA MELA 2022 hawnna hun hi Principal Secretary Health & Family Welfare Esther Lalruatkimi chuan a kaihruai a, khual zahawm Health & Family Welfare Development Board Vice Chairman Dr. ZR Thiamsanga chuan AROGYA MELA 2022 in a tum ber chu hriselna kawnga hma kan sawn a ni tih sawiin, Ayushman Bharat nen pawh kalkawp rem tak a nih thu leh Mizoram-ah hlawhtling taka AROGYA MELA hawn a ni thei chu lawmawm a tih thu a sawi a. Dr. Lalzipuii hnen atangin AYUSH Mission hnuaia hmalakna hrang hrang ngaihthlak niin Dr. Lalkhawngaihi Renthlei chuan lawmthu a sawi bawk.

AROGYA Mela 2022-ah hian stall hrang hrang inphochhuak firm 20 vel an awm a. Mela chhung hian Free Clinic, Seminar, Farmers' Meet, Medical Plant Display, Live Yoga Demonstration te buatsaih a ni dawn a ni.

Tun dinhmunah hian Ayush Doctor te hi District Hospital 11, Community Health Centre 7, Sub-Divisional Hospital 1, Primary Health Centre 8, Integrated Ayush Hospital, Thenzawl; State Referral Hospital, Aizawl OPD-ah te rawn theihin an awm a, damlo hnenah damdawi a thlawna pek thin an ni a. Tunhnaiah Ayush Health & Wellness Centre 38 chu National Ayush Mission, Mizoram hnuaiah awmin, heng zingah Centre 24 te chu hman mek a ni a. Heng bakah hian khum 50 awm tur, Integrated Ayush Hospital, Aizawl atan hmalak mek a ni a, khum 10 awmna tur Ayush Hospital, Saitual pawh proposal pawm fel a ni tawh a. Hmasawnna chhawp-chhuah tam tak awmin, chung zingah chuan Medicinal Plant Nursery siamna tur Lengpui leh N.Vanlaiphai chu KVK te nen tangkawpa din tura hmalak mek a ni bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man