Aizawl-ah 'College Hmasawnna Hnatlang' neiin inremna neih a nih hnuah zirlaite an tindarh

Mizo Students Union (MSU) huaihawtin nimin khan Aizawl-a Vanapa Hall kawt-ah College zirlai thahnem tak chuan Admission leh Tution Fee sawrkar-a chhunluh duh loh lantirin 'College Hmasawnna Hnatlang' an nei.

Vanapa Hall kawt a zirlaite punkhawmna ah MSU hruaitute chuan Zirlaiten Admission Fee leh Tution Fee Rs. 1,320/- an chawi thin chu sawrkarah lut lo a College tih hmasawnna atan hman an phut tih an sawi a. Sawrkar awm tawh zawng zawng ah College zirlaite Admission Fee Rs. 120/- bakah Tution Fee Rs. 1,200/-, a vaiin Rs. 1,350/- chu sawrkar ah an chawi thin tih sawiin, chu chu MSU chuan tha ti lovin, kum 2013 leh kum 2017-ah sawrkar ah an lo thlen tawh tih an sawi a. Kum 2019-ah Bairabi-a MSU General Conference-ah Rorel Agenda-ah nei lehin, kum 2020 March thla ah an rorel bawhzuiin Chief Minister Zoramthanga hnenah an thlen tih an sawi bawk a. Hemi chungchang hi kum 2022 October thla a MSU General Conference-ah Agenda ah an dah leh thu te, College zirlai hmasawnna tura MSU in rawtna an thlen te sawrkarin a ngai pawimawh lo nia an hriat avangin he hun hi an thleng ta niin an sawi bawk.

Zirlaiten Admission Fee leh Tution Fee Rs. 1,320/- sawrkar a chhunluh an phalloh nachhan tarlang bawkin MSU hruaitute chuan, “Central enkawl University te chuan anmahni in develop nan te, zirtirtu indaihlo rawih belhna atan te, College Building sakna atan te, Property leina atan te an hmang a, chung atana hman ve tawh chu kan duh a, zirlaite kan pungkhawm a ni,” an ti bawk a. Kumin a zirlaiten Admission leh Tution Fee sawrkar a an chawi zat chu cheng vbc. 2.72 a tling niin an sawi bawk.

Hemi hnu hian MSU leh Sawrkar aiawhte chuan inbiakna neiin College admission Fee atanga zirna In tihchangtlunna tur ruahmanna siam turin inremna siam a ni a, hemi atana tihfel ngai te chu File-ah kaltir nghal niin an inrem dan chuan, zirlaite Admission fee chu a hma angin Sawrkar sum bawmah a lut phawt anga, College in ruakhai taka an chan theih nan an mamawh ang zela pekchhuah theih tura duan a ni dawn thung a ni. 

Comments

Popular News (Last 30 Days)

LPG man bithliah thar