Kum 60 tlin lawmna Chief Minister in a hmanpui

Niminpiah khan Govt. Vengthlang Middle School, Champhai ten an kum 60-na, Diamond Jubilee lawmin he School Headmaster hmasa ber leh tuna Chief Minister Zoramthanga chuan khuallian niin a hmanpui a ni.

Chief Minister hian Diamond Jubilee hriatrengna lungphun hawngin he School Headmaster hmasa ber a nih dan leh a bulthut atanga din chhoh a nih dan te a sawi a. Tunah School changtlung tak ni theiin leh zirchhuak (alumni) hlawhtling leh langsar tak tak te an nei chu lawmawm a tih thu a sawi a. Tuna zirlai la ni mekte pawh hlawhtlinna an chan theuh a duhsak thu a sawi. Chief Minister chuan tumruhna pawimawh zia sawiin, mi hlawhtling dangdai te hi mi naran, tumruhna nasa tak nei an nih mai thu an sawi thin chu rilru ah pai rengin, an zirlai ah theihtawp chhuah turin a chah a ni.

Govt. Vengthlang Middle School Champhai din anih theih nan hian Sawrkar atangin School hawn phalna December ni 20, 1961 khan dawn niin, January ni 16, 1962-ah mimal In luah hawhin bultan a ni a. Headmaster hmasa ber leh Zirtirtu hmasa ber atan tuna Mizoram Chief Minister nihna chelh mektu Zoramthanga chu ruat a ni a, phungbawm atan mi pathum dang ruat an ni bawk a. August ni 1, 1962-ah Aided School-ah hlankai a ni a, March ni 1, 1969-ah Deficit-ah hlankai niin, December ni 1, 1991-ah Provincialize a ni. He School-ah hian tun dinhmunah Zirtirtu 16 leh Zirlai 141 an awm mek a.  Headmaster 9 an nei tawh a, Zirtirtu awm tawh zawng zawng zat chu 116 niin, IV Grade 7 leh Zirlai 5169 te an awm tawh bawk a ni.