Tuirial Airfield peng bula Oil Tanker kang-ah mi 4 thiin mi 14 an hliam; Motor dang 3 kangchhia

Inrinni kalta (Oct. 29, 2022) chawhnu lama Tuirial Airfield peng bula tuialhthei phurtu lirthei chesual chu kang zuiin mi 4 in nunna an chan bakah mi 14 ten hliam an tuar a, Motor dang pathum a kangchhe bawk.

Thudawn danin Inrinni chawhnu dar 2:30 vel khan Phai lam atanga Mizoram-a Petrol phurtu Oil Tanker pakhat chu Aizawl leh Tuirial inkar, Tuirial Airfield peng atanga Tuirial lama Lalnghakliana Picnic Spot kawngkual-ah chesualin kawng ah a tlu a, he Motor in a phurh Petrol baw ral tur chu mi thenkhat ten dawhin khaw thim hnu dar 5:30 pelh hnu khan he Motor leh a phurh Petrol te hi a kang zui a, vanduaina rapthlak tak thlengin mi 4 ten nunna chanin midang 14 velin hliam an tuar a ni.

Police te sawi danin he vanduaina thlenga nunna chan te hi Rohlira (74) H/o C. Lalremmawii Tuirial; Sangremzovi (36) W/o Lalrinawma (L) Tuirial; Lalnunhlima (36) H/o Esther Vanneihtluangi, Thingsulthliah leh Dennis Lalthianghlima (29) S/o Lalzawna, Ramthar Veng Aizawl-a awm, Lamherh khua te an ni a. Hliam tuar mi 14 zingah mi 3 te chu na zual deuh niin an zinga pakhat hi Durtlang-a Synod Hospital ICU-ah enkawl a ni a, midang pahnih hi Civil Hospital Aizawl-ah enkawl niin an kang nasa hle nia thudawn a ni bawk.

Lirthei chesuala kangmei chhuah dan hi chiang taka hriat ni lo mah se Petrol dawhtu zinga Meizial zu emaw, Gas lighter tih alh emaw atanga intan nia rin a ni a, kangmei chhuak hian a chhak lama In pakhat chu kangin kawngpui-a Taxi pakhat leh Two Wheeler pathum chu a kangchhe bawk nia thudawn niin kangmei hi Fire Services ten thelh tum mah se thelh mit mai thei lovin hun engemaw chen an beih hnuah an thelh mit thei chauh a, Police te chuan he thil thlen dan hi an chhui zui mek nia thudawn a ni bawk.

Bialtu MLA leh Chief Minister Zoramthanga chuan vanduaina thlenna hmun hi Inrinni zan kan thleng nghalin nunna chan te ruang chungah pangpar dahin puan in a tuam a, a tul anga an hman atan Tuirial khawtlang hruaitute hnenah Rs. 10,000/- a hlan nghal bawk a ni.