Boruak muanawm tak hnuaia ramri chinfel duh

Tripura State-a Mizo inzawmkhawm pawl lian ber, Mizo Convention chuan Mizoram leh Tripura ramri chu boruak tha tak hnuaiah chinfel nise an duh thu an sawi.

Mizo mipuiten Mizoram chhunga awm tlang pakhat, Thaidawr chu Tripura-in an State tlang sang bera a pawm chungchang ah zawhna chhangin Mizo Convention Secretary Dr. Zairemthiama chuan helai tlang chungchang hi State pahnih hruaituten boruak tha tak hnuaiah chingfel se tih chu an duh dan a ni tih a sawi a. “Mipui pawm danah Phuldungsei khua (Tripura) atanga PWD kawngpui hi State pahnih ramria ngaih a ni a, he kawngpui khawchhak lam hi Mizoram leh khawthlang lam hi Tripura chan a ni a. Mahse, heti chung hian tunhma atangin Mizoram chhunga ngaih Thaidawr tlang (Tripura lamin Bethlingshib an tih) chu an State a tlang sang ber angin a cheibawl a ni,” a ti. 

Dr. Zairemthiama chuan he thil chungchang hi tumah indem theih a ni lo tiin politics-a hamthatna atan phei chuan hman an duh lo tih sawiin, “Tu sawrkar mah dem tur an awm chuang lo a, an vaiin an lo ngaihthah vek a. Kan duh dan chuan State pahnih Chief Minister-te hian tha takin sawiho se kan duh a, an inremna ang ang chu kan pawm a. Ram buai anga a awm chuan Jampui Mizote hian kan tuar thei dawn a ni,” a ti bawk.

Thaidawr tlang panna ah hian Tripura State Rifles an duty a. Mizoram chhung ngeia awm si, Tripura sawrkar remtihna tel lova tlawh theih a ni lo hi Jampui tlangdunga Mizote chuan hrehawm an tih thu an sawi. Thaidawr tlang/Betlingshib hi tlawhtu an tam thei hle a, a bikin Thlasik chawlh laiin tlawhtu an tam zual niin he tlang bulhnaia awmte chuan an sawi bawk.