Inthlan buatsaih ngam lo ah ZPM-in sawrkar puh

ZPM Party chuan Zemabawk Local Council thiah taka inthlanna neih hun a ni tawh chunga inthlanna la buatsaih a nih lo leh Lunglei Municipal Council-a inthlan a an buatsaih har lutuk chu an hriatthiam loh thu an sawi.

Nimin-a Aizawl Press Club-a thuthar thehdarhtute an kawmna ah ZPM General Hqrs. a Secretary General PC. Vanlalruata chuan Chief Minister bial Zema-bawk Local Council-ah MNF Member 4, Congress Member 2 leh ZPM Member 1 awmin MNF Member 1 leh Congress Member 1-in ZPM an zawm tak avangin ZPM-in Member 3, MNF in Member 3 leh Congress-in Member 1 an nei ta a. Sawrkar siam thei an awm tak loh avangin dan angin Zemabawk Local Council chu August ni 16, 2022-ah thiah (dissolved) a nih thu a sawi a.

Local Council hi thiah (dissolved) anih chuan thiah a nih atanga ni sawmruk chhungin a thara inthlanna buatsaih leh tur a nih thu leh August ni 16, 2022-ah thiah (dissolved) a nih atanga ni 60 a ral hnu, October ni 16, 2022 thlengin inthlang tura hmalakna pakhatmah hmuh tur a awm lo niin an sawi a, Mizoram State Election Commission-ah General Administration Department (GAD) atangin inthlan buatsaih a ngaih thu engmah hriattirna a la awm lo nia an hriat thu an sawi bawk.

Hei bakah hian ZPM chuan Mizoram sawrkar chuan Lunglei Municipal Council dinin kumin chhung ngeia inthlanna neih a ni ang tiin a changtu Deputy Chief Minister-in vawi hnih (2) ngawt mipui hmaah a puang tawh tih an sawi a, “Amaherawhchu Lunglei kawngpui a chhiat lutuk avanga Sub-Hqrs YMA-in October 18, 2022 a nawrhna (No Vehicle Day) an hman tak si avangin LMC inthlan buatsaih chu an ngam leh dawn lo niin kan hria a, a pawi kan ti takzet a ni,” an ti bawk.