Mizoram HSS Games vawi 19-na zawhfel a ni

Mizoram Higher Secondary School Games vawi 19-na chu nimin khan zawhfel niin Govt. JL Higher Secondary School chu an champion a ni.

Kumin-a HSS Games-ah hian Aizawl khawpui chhung Higher Secondary School 14 leh Aizawl khawpui pawn School 12, an vaiin School 26 atangin infiam mi zirlai mipa 473, hmeichhia 338 leh Lecturer 109, an vaiin 920 an tel a. A pumpuia Govt. JLHigher Secondary School chuan Gold 4 leh Bronze 1 lain an champion a. Best Athlete (Girls) chu Elisian Meidaii, Baptist HSS Serkawn niin Gold 3 a la a, Best Athlete (Boys) chu Lalmuansanga, Govt JL HSS niin Gold 4 a la a. Badminton (Boys)-ah St. Pauls HSS, Badminton (Girls)-ah Govt. Mizo HSS, Football (Boys)-ah Govt C. Zakhuma HSS, Kolasib leh Volleyball (Girls)-ah Khawzawl HSS an champion bawk.

Nimin a School Games kharna Inkhawm Aizawl Vanapa Hall-a neih chu School Education Minister Lalchhandama Ralte chuan hmanpuiin NEP 2020-in Sports hi a ngaih pawimawh avangin zirna kara tlazep ni mai tawh lovin Subject dang ang bawka pawimawh a ni tan dawn tih a sawi a. A bultan nan Elementary School 40-ah Grassroot Level-a kalpui a ni dawn a, District hrang hrangah heng Sports zirna tur Centre hi thlan fel tawh niin kumthar-ah School tam zawkah huang zauh zel tum a ni tih a sawi bawk.