Kawngpui tha neih dan tur hi kan hria - PC Party

PC Party chuan nimin khan Aizawl-a an Office-ah Mizoram kawng chhe chungchang sawihona neiin he hunah hian an Party President Vanlalruata chuan, “Kawngpui tha neih dan tur hi kan hria a ni,” a ti.

Nimin-a he sawihona ah hian kawngpui kan nei tha lo pawi an tih thu leh Sawrkara thuneituten kawngpui chhiat chhan an sawi thin an pawm loh thu sawiin, “Kan kawngpui chhiat chhan langsarte chu eirukna te, kawng siam nana hmanraw hman that tawk loh vang te, sawrkarin hna thawktu a ngam lo te, kawng siam thatna tur sum a tam tawk lo te ni-ah kan ngai a. Kawngpui tha kan neih theih nan soawrkar huaisen leh a ngaihna hria kan mamawh ah kan ngai a ni,” an ti.

He hunah hian PC Party President Vanlalruata chuan, “Inthlan dawnin party-ten kawngpui tha kan tiam thin a, sawrkarna changtu ten kawngpui tha min pe leh thin si lo hi sawrkar huaisen loh vang leh a ngaihna tak tak hriat thin loh vang a ni,” a ti a. “Kawngpui tha kan neih theih nan Department chhut danin, kawngpui enkawlna atan kumtin cheng vbc. 230 vel kan mamawh laiin kawngpui enkawl nan cheng vbc. 40 bawr chauh sawrkarin a dah thin a. Hemi siam tha tur hian keini chuan a ngaihna kan hria a ni,” a ti a. “Tunah hian inthlan hmachhawn turin party-te kan inbuatsaih leh mek a, kawngpui tha kan tiam leh hlawm ang. Eng angin nge kawngpui tha nei tur chuan hma lak kan tum hlawm mipuiin an hriat a ngai a. Mipui kan dil chhut a, kawngpui tha tiamtute chu eng anga hma lak nge an tum kan zawh chian ngam a ngai a ni,” a ti. PC Party chuan kawngpui tha neih hi an policy pui pakhat a nih thu leh Six Basic Needs-ah pawh a awm thlap thu an sawi bawk.