Dan lova ramsa tawlh man Larsap an sawipui

Youth for Environment Justice Mizoram(YEJM) aiawhte chuan nimin khan Governor Hari Babu Kambhampati kawmin ramdang atanga ramsa tawlhruk te dan leh thupek kengkawhtu ten an lo man leh heng ramsate lo enkawl lailawkna kalpui dan chungchang te an sawipui.

Tlawmngai pawl pakhat, Youth for Environment Justice Mizoram (YEJM) ten nimin-a Governor an kawmna ah hian YEJM hruaitute chuan ram pawnlam chauh a awm, ramsa thenkhat (exotic animals) te tunlai hian Mizoram-ah dan leh thupek kengkawhtu ten man an nei tam tawh hle tih sawiin, heng pawnlam ramsate hi an rin dan chuan South East Asia ram thenkhat atangin ramri kan-a Mizoram-ah rawn luhpuia hmundangah te la zawrh/hralh tur ni ah an ngai tih an sawi a ni.

YEJM hruaitute chuan rampawn lam ramsa te hi dan leh thupek kengkawhtuten an lo man chu tha an tih thu sawiin, an ramsa man te lo enkawl lailawkna erawh duhthu a sam lo takzet tih an sawi a. Pawnlam ramsa hren lailawk te hi bawm te tak te ah te, Sahuan-ah leh a remchang changah duhdah takin khung an ni a. Chaw tha leh an mamawh ang chi te pek a ni lo te chu tha an tih loh thu te an sawi a. Heng pawnlam ramsa mankhawm te hian hrileng lo keng lut thei an nih thu te leh Mizoram chhunga ranvulh te leh ramsa te tan hri thalo an rawn pu lut thei a. Tuna enkawlna pek an nih dan hi a him lova, Aizawl-ah leh Champhai-ah heng ramsa mankhawmte lo enkawl lailawkna (holding facility) hi siam thuai ngai an tih thu an sawi a. Hemi chungchangah hian Governor chu a kaihhnawih Department hotute sawipui tura ngenin, Environment tih chereuna lam hawia hmalakna thenkhat leh Governor inrawlhna tura an ngaih lai te pawh an sawipui bawk.

Governor chuan Mizoram thalaite zingah kan chhehvel leilung leh boruak min tuamtu chhe mek zel vei a, a siamthat hna thawk tura rawn penchhuak an awm belh mek chu thil lawmawm tak a nih thu he an inkawmna ah hian sawiin, Enrvironment chhe mek hi khawvel in a mangan pui mek a ni a; Mizoram-ah pawh changkanna leh hmasawnna in a ken tel thil thenkhat avanga kan Environment chhe mek te siamthat ngai a awm nual thu a sawi a. YEJM Member te leh environment humhalh kawnga tui thalai rual te chu vawikhat chauh hman theih sarang hmang lo tura mipui zirtirna pe a tan la zel turin a chah a. A hmatawnga hmalakna atan luikawr leh lui dunga sarang lam paih tihtawp a nih theih nan chak taka hmalak a pawimawh tih a sawi bawk. He hunah hian YEJM Convener Vanramchhuangi leh a thawhpuite telin, an pawl hmalakna te chu Governor hi hrilhin thawhpui ah an sawm nghal bawk a ni.