Vehicle Inspection and Certification Centre sakna turin Minister in lungphum a phum

Transport Minister TJ. Lalnuntluanga chuan nimin khan Hlimen a Transport Department ramah Vehicle Inspection and Certification Centre (I&C Centre) sakna tur lungphum a phum.

Lirthei khalhtu leh a chuangte himna chu State Transport Department bakah India sawrkarin ngai pawimawh in rampuma State leh UT tinah I&C Centre hi dah tura ruahmanna siam niin chumi ruahmanna peng pakhat atan he lungphum hi phum a ni a. He Project atan hian sawrkar laipui chuan cheng nuai 1550 dahin Mizoram sawrkar nen 90:10 a intum sem tur a ni. Khawl leh hmanraw changkang tak taka thuam a nih dawn avangin mihring mit lawng (manual) a motor him leh him lo endik thin chu Computer leh khawl-in a thlak vek tawh dawn a, heng endikna khawl in Motor Test te a fit lo a tih chuan khawlai ah tlan phal an ni dawn tawh lo a. Pollution check na tha tak a nih bakah motor chuanna atana him tawk leh tha tawk a ni em tih enfiahna tha tak a ni dawn a ni. A building sak leh a hmunhma siam hna thawk tur hian Central Institute of Road Transport (CIRT), Pune hnuaiah e-tender tihchhuah niin Vinco Construction te chu thawk tura thlan an ni.

Nimin-a lungphum phumna hunah hian Transport Minister chuan Transport Department hnuaiah hmasawnna hrang hrang thleng chho zelin chung zingah chuan Mizoram mipuite tana tangkai tur project lian tak, Vehicle Inspection and Certification Centre sakna tur bul tan a ni dawn ta chu lawmawm a tih thu a sawi a. India ramchhunga State upa tawh leh changtlung tawhte um pha turin Mizoram in tan a lak thu sawiin, Transport Department bikah phei chuan tunhnaiah State changkang zawkte tih dan kan um pha chho ve thuai thuai thei chu lawmawm a tih thu a sawi a, “Hmasawn zel turin kan ramin a mamawh ber ni a ka hriat chu inhmangaih tlanna leh thawhhona tha a ni,” a ti bawk.

Lungphum phumna puala hun hman hi Transport Department Commissioner & Secretary KT. Beicho chuan kaihhruaiin Transport Director Er.R.Lalrammawia’n he project intan dan leh funding hmu thei tura tan an lak dan te a sawifiah a. Vinco Construction CEO in project chungchang a sawifiah bakah bialtu MLA Prof. F. Lalnunmawia pawh thu a sawi bawk a ni.