CM in Workshop a hawng

Chief Minister Zoramthanga chuan Aizawl Sustainable Urban Transport Project (ASUTP) chungchanga ni khat awh Workshop chu nimin khan a hawng.

Aizawl-a Mizoram Rural Bank Auditorium-a 'Review of Existing Scenario & Finalising Mobility Indicators' tih thupui hmanga Workshop hawnna ah hian Chief Minister chuan khawpui thang zel avanga kawngpui tawt ta lutuk chu tihziaawm dan zawnga kawng hrang hranga hmalak a nih dan sawiin, he Workshop buatsaih chuan mithiamte rilru chawk tho a, Aizawl tana tha tur ber ngaihtuahna a thlen ngei a beisei thu a sawi a. Khawpui hmasawnna chu a chhunga cheng mihringte tan harsatna ni lovin awlsamna a thlen zawk tur a nih avangin nakin zela tangkaina leh awlsamna min thlen thei tur hmasawnna ruhrel din a pawimawh a tih thu a sawi a. PAHOSS leh hmalakna dang hrang hrang siam a lo nih tawh dan te, kawngpui lunlai tawt lutuk tih thawl nana project lian tham hrang hrang buaipui mek leh khawpui chhehvela lirthei lian tan terminal siam te, sawrkar laipuia Ministry of Road Transport and Highways changtu Minister hnena kawng siamthat leh siam belh mamawhna te a thlen thu Chief Minister hian a sawi bawk.

He hunah hian Azawl khawpui tana chet velna tiawlsam thei tura rawtna hrang hrang te sawiho niin, he project in a kaihhnawih sawrkar Department hrang hrang te bakah NGO hrang hrang te nen pawh lo sawiho tawh a ni. Hetiang Workshop hi November thla ah neih leh tur niin inkalpawhna tha leh changtlung zawk neih dan bakah he project in a tum tak tih hlawhtlin dan turte sawiho leh zirho tur a ni ang.

ASUTP hnuaia Project Planning, Development and Management Consultants (PPDMC) atan Mis Mott MacDonald Pvt. Ltd. chu rawih niin anni hian Comprehensive Mobility Plan (CMP) chu hna hmasa ah neiin an thawk mek a ni.