Serchhip-ah Project Himna Madat kaltlangin Vaihlo, zu leh ruihhlo thatloh zia inzirtirna neih a ni
Govt. Serchhip College Seminar Hall-a he hun hman hi Govt. Serchhip College-a Asst. Professor Dr. Rebecca Lalmuanpuii chuan kaihruaiin he hun hmanpuitu Govt. Serchhip College Principal K. Laldinpuii chuan hetiang hun an College a buatsaih a ni chu lawmawm a tih thu a sawi a. He College in Zirtawpni chawhnu lama zirlaite tana hetiang kawng hrang hrang inzirtirna atana an ruahman tangkai taka hman a ni thin chu lawmawm a tih thu leh zirlaite tana thil tangkai dang inzirtirna atan pawh hman zel theih a nih thu a sawi bawk. Govt. Serchhip College Principal chuan Mizo Society-ah zuk leh hmuam, Vaihlo leh a kaihhnawih thildang tih chu sual ah ngaih a ni lutuk lo tih sawiin, amaherawh chu hetiang thil te hi hnamdang nena kan khawsak hona ah chuan thil hnawk tak leh min ti cheptu a ni tih a sawi a, tunlai thalaite zingah zuk leh hmuam lama fihlim tam tak an awm ta chu lawmawm a tih thu a sawi a, hetiang hun an hman hi zirlaite pawhin hmang tangkai ngei se a duh thu a sawi bawk a ni.
'Zuk leh hmuam, ruihhlo laka zirlaite venhim' tih thupui hmanga nimin-a he hun hman ah hian National Tobacco Control Programme (NTCP) Serchhip District-a Nodal Officer Dr. Lalngaihawmi Chhangte chu Resource Person atan hman niin 'Project Himna Madat' chu hun engemaw chen Serchhip District-ah kalpui a nih tawh thu a sawi a, he hmalakna hnuaia zirlaite tana Essay inziahsiakna te buatsaih a ni chu lawmawm a tih thu sawiin, zirlai kalkhawmte hnenah zuk leh hmuam, ruihhlo chi hrang hrang in a huam chin te, mihring taksa ah nghawng a neih theih hrang hrang leh hetiang thil laka fihlim a pawimawh thu te a sawi a. Hetiang zuk leh hmuam hrang hrang ti thin zinga sim duh tan Tobacco Cessation Clinic (TCC) chu Serchhip District Hospital OPD building-ah pan theih reng a nih thu a sawi bawk.
He hunah ‘Project Himna Madat’ Serchhip District hmalakna a Govt. Serchhip College zirlaite tana 'Zuk leh hmuam ruihhlo laka zirlaite venhim' tih thupui hmanga Essay inziahsiakna neih a titha te hnenah lawmman semna neih niin K. Lungtiawii (3rd Sem BCA) chu pakhatna niin Malsawmzeli (5th Sem BA) chu pahnihna leh Lalramhluna (3rd Sem BA) chu pathumna an ni a, zirlai pathum te hnenah Consolation prize hlan an ni bawk.
Comments
Post a Comment