Ministry of Home Affairs Joint Secretary hovin Vawiin ah Bru chungchang sawiho a ni dawn

Tripura a\anga Bru te hruaikir hna thawh chungchang sawihona chu Vawiin hian neih a ni dawn a, he huna tel tur hian Ministry of Home Affairs-a India hmarchhak changtu Joint Secretary, Satyendra Garg chuan Aizawl a rawn thleng tawh a ni.

Home department hotute sawi danin MHA-a Joint Secretary hi tunhnaia Bru laklet tura beihna a hlawhchham tak chungchang leh kalpui zel dan tura Mizoram sawrkar hotute nena inrawn tlang tura lokal a ni a. He inbiakna ah hian Mizoram sawrkar-a Home Department hotute bakah District pathum-a DC te, Central YMA hruaitute leh Equal Package Demand Committee hruaitute an tel dawn a ni. Tarlan tawh \hin angin kum 2016-a Tripura Camp hrang hrang enfiah a nih khan Bru chhungkua 5,407 a mi 32,876 te chu Mizoram mi diktak an ni tih hmuhchhuah a ni a, tun \uma Bru laklet ah khan Mizoram-a rawn kir duh-a in report engemaw zat an awm chungin chhungkaw pathum chiah rawn kir an awm a ni.

Sawrkar laipui a Ministry of Home Affairs hian tun \uma Bru laklet hi a hnuhnung ber tur nia sawiin an lokir vek duh beiseina an nei sang hle a. An beiseina tisangtu chu kumin July ni 3 a Union Home Minister hova Delhi a an inhmuhkhawmnaa inremna an ziah vang kha a ni a. He inhmuhkhawmna ah hian Mizoram leh Tripura Chief Minister bakah MBDPF aiawhte, Central YMA aiawhte leh Bru lokir tawh aiawhte an tel a. Heta an inremna ang chuan Bru lokir apiang chu chhungkaw hotu ber Bank Account-ah kum 3 hnu a lakluh turin cheng nuai 4 dah vek a ni ang a. In sakna atan chhungkaw tin Rs. 1,50,000/- pek an ni ang a. Kum hnih chhung chu chhungkaw tin hnenah Rs. 5000/- pe-in ration pawh a thlawnin kum 2 chhung bawk pek tur a ni ang.

Amaherawh chu he inremna hi Bru Relief Camp a awm tam tak chuan duh lovin July ni 16 khan an pungkhawm a. Naisingpara Camp-a MBDPF pisa chu hualin an President, he inremnaa hming ziaktu A. Sawibunga chu inremnaa a hming ziah leh remtihna hnukdawk turin an nawr a. Anni hian Kanchanpur SDO kaltlangin a hming ziah hnuhdawhna hi a thawn ta a ni.

Hetih lai hian tunhnaia Joint Monitoring Group \hutkhawmnaah Ministry of Home Affairs a Special Secretary (Internal Security), Pi Rina Mitra chuan tun \uma Bru laklet hi a tawp ber tur (final) a nih tawh thu a sawi a. September ni 25 a zawhfel tura ngaih Bru laklet hna hi zawh a nih hnu chuan October ni 1 a\angin Bru Relief Camp zawng zawng kharin \anpuina pek \hin pawh tihtawp a nih tur thu a puang a ni.