Mamit-a DC Office Staff te Pisa kai tur dan an ni

Mamit District Bawrhsap, Bhupesh Chaudhary, IAS chhuak tura nawrna kal zelah Bawrhsap hi Aizawl lamah kalin amah awm lo mah se nimin khan Mamit-a All NGO leh All Political Party huaihawtin DC Office bulah DC Office staff-te pisa kai tur chu an dan an ni a. He hunah hian Sub-Headquarters YMA President, K.Elly Rosanga chuan District Bawrhsap lim a hal bawk.

Inrinni-a an lo rel tawh angin niminpiah thlenga Mamit DC hi sawrkarin a la sawn chhuah loh avangin nimin- DC Office-a thawk te Pisa kai tur hi Mamit-a All NGO leh All Political Party hian dan turin ruahmanna an siam a. Nimin chawhma khan Mamit DC Office tualah Mamit mipui \hahnem tak an pungkhawm a; DC hi niminpiah tlai lama Aizawl-a a chhoh avangin amah awm lo mah se DC Office staff-te chu an dang tho a, pisa pawh an kai theilo a ni.

He hunah hian K.Elly Rosanga, President, Sub-Hqrs. Mamit chuan Mamit mipuite \anrualna chu lawmawm a tih thu leh nakin zelah pawh inlungrualna vawng nung zel turin a ngen a. “Bhupesh Chaudhary hian tunah hlauhna vangin Mamit chhuahsan mah se Official-in Mamit DC a la ni reng a, Mamit DC ni tura a lolet leh hi kan remti tawh lo va, a lo let leh a nih chuan a chungah engpawh thleng se Mamit mipuiin mawh kan phur lo vang,” a ti.

Nimin a Mamit-a mipui pungkhawmte hian resolution siamin Bhupesh Chaudhary chu Mamit-a let tawh tur a ni lo an ti a. Mizoram a chhuahsan tur leh a Transfer Order chu rang taka sawrkarin tifel tura nawrna te an resolution-ah hian a tel bawk.

Mamit-a tlawmngai pawl hrang hrangte leh political party-ten Mizoram chhuahsan tura an duh, Mamit DC hian niminpiah tlai khan Aizawl a pan nia hriat a nih avang hian lo dan tumin nizan hmasa khan Aizawl khawpuiah Central YMA huaihawtin punkhawm a ni a, a nupui chenna Quarters, New Secretariat Complex, Aizawl bulah a lut dawn nia hriat a nih avangin Central YMA chuan nizan hmasa khan Aizawl khawpuia Branch hrang hrangah hriattirna chhuahin lo dan tumin chân a ni a. Secretariat luhna Main Gate bakah Dinthar-a finkhawm Lei-ah chân a ni a. Chief Secretary Quarters-a luhpui tumna a awm nia hriat a nih bawk avangin Tennis Court bulah chân a ni bawk a.

Boruak \halo thleng thei venthawnna avangin Mamit DC Bhupesh Chaudhary hi Aizawl khawpui luhpui lovin Lungverh-a 5th IR Bn. hmunpuiah luhpui a ni ta zawk a. Hetiang a nih avang hian pungkhawmte pawh an \indarh zui a, he hunah hian YMA hruaitute chuan Mamit DC chu Mizote hmusittu a nih vangin Mizoram-ah a awm an rem tih loh thu leh a haw lo a nih chuan a awmna chin an chhui zel dawn thu an sawi bawk.