Zirna quality a sang chho ve zel - Edn. Minister

School Education Minister, H. Rohluna chuan Zirna chungchang ah hmasawnna ruhrel dinna ah hma kan la nasa a, zirna quality pawh a sang chho ve zel a ni, a ti.

Nimin a SCERT Multipurpose Building leh DIET Hostel Building, Chaltlang-a a hawnna ah he thu hi sawiin School Education Minister chuan Sawrkar laipui leh NEDP a\anga sum hmuh hmangin Aizawl-ah Education Centre changtlung tak sak mek a nih thu sawiin, Kan hnam dinchhuahna atan zirna lama hmasawn a ngai a, zirtirtute an nihna tur ang taka chherchhuah hi kan tihtur a ni, a ti a. Kan rama zirna \ha kan neih theih nan zirtirtute hian mawhphurhna lian tak an nei tih sawiin, Zirlaiten an mamawh anga in kaihhruai theih nan rilru nei takin training hun in hman a ngai a ni, a ti.

School Education Minister chuan Zirtirtute tan training hi a pawimawh telh telh dawn a, nakum lam atang chuan zirtirtuten training paltlang ngei ngei tura kalpui beisei a ni a, hei hian sawrkar leh mimal School pawh a huam a ni, a ti a. Kan state budget-ah pawh zirna atan pawisa tam tham tak dah a ni tih sawiin, hemi hmang hian \halai chhawrtlak leh hmantlak chherchhuah bakah zirna lama nasa taka hmasawn tum a ni, a ti a. Hemi atan hian department a\angin nasa taka hma an lak thu leh heng hmalakna te a hlawhtlin nan hian zirtirtute an pawimawh hle a ni, a ti bawk.

SCERT Multipurpose Building hi cheng nuai 175.68 senga sak a ni a, March Ni 22, 2016 a sak \an niin January ni 31, 2018 khan sak zawh a ni . Building hi chhawng nga a ni a, Seminar Hall, Dining Hall, Quarters, Dormitory leh lirthei park-na tur a awm a, rualbanlo ten an hman theih turin lift pawh ruahman a ni. DIET Hostel Building hi cheng nuai 198.49 senga sak a ni a, January ni 15, 2016 khan sak \an niin January ni 6, 2017 khan sak zawh a ni a. Chhawng li (4) niin, zirlaite room leh Seminar Hall a awm a ni. Heng building te hi Centrally Sponsored Scheme a\anga sak a ni a, NEDP a\angin Inchhung chei hna thawh a ni dawn bawk a ni.