Cheng nuai 233.53 senga sak thar Serchhip DIET Institutional Building hawn a ni

Chief Minister, Lal Thanhawla chuan nimin khan cheng nuai 233.53 senga Serchhip Chanmari Veng-a DIET Serchhip Institutional Building sak thar chu a hawng a, he hun hi School Education Minister, H. Rohluna pawhin Khual Zahawm niin a hmanpui a ni.

Serchhip Chanmari Veng-a DIET Building thar hawnna hunah hian Chief Minister, Lal Thanhawla chuan tun kum 10 chhungin Education lamah Mizoram in hma kan sawn nasa hle tih sawiin, DIET Building pawh District tinah tunhnaiah hawn a nih thu leh Serchhip District chu DIET building hawn hnuhnun berna a nih thu a sawi a. Zirna tihmasawn turin kawng hrang hrangah a \ul angin sawrkarin hma lain theihtawp a chhuah \hin tih sawiin, chung zingah chuan India state zinga a hmasa ber pawl ni tura Education Reforms Commission din a nih thu te, chumi a\anga textbook leh Curriculum Reform siam takin hmasawnna a thlen dan te, zirna chhawrtlak chher chhuak a 'Export Quality Education' nei tura zirlaibu thiamna bakah Skill development lama hmalakna te a sawi a. Infrastructure \ha tak takte hi siam a nih chhan hre reng chunga \angkai taka hmang turin kalkhawmte a chah a. Building vawnfai ngaipawimawh tura chahin, Serchhip DIET Campus chei nan thingphun an uar chu a changkang hle a a hriat thu a sawi bawk.

He hunah hian Khualzahawm School Education Minister, H. Rohluna chuan tunhnaia District pariat-ah DIET building sak tura ruahmanna siam te tihlawhtling a lungawithlak taka thawktuten a sak hna an zo chu lawmawm a tih thu sawiin, Sum lo kal a\angin a chhung cheina turte awm tel \hinlo mah se sawrkar hotute hmalakna avangin building mamawh bungrua leh zirlaite mamawh hmanrua hrang hrangte dah a ni thei chu a lawmawm hle bawk a ni, a ti a. Zirna in hma a sawn dawn chuan zirtirtute thiamna leh inpekna a pawimawh hmasak ber thu sawiin, chumi avang chuan zirtirtute training \ha pek chu state sawrkarin a ngaihpawimawh thu a sawi bawk.

Serchhip DIET Institutional Building thar hi CSS a\anga sum hmuh hmangin June 12, 2015 khan sak \an niin nikum Nov. 10 khan sak zawh a ni a. Building hi chhawng thum a sak niin, chhawng tin zau zawng belhkhawm chu metre 758 bial a ni. Ground Floor-ah Classroom pahnih, Library, Resource Room leh Toilet awmin First Floor-ah Principal Room, Staff Room, Waiting Room, Teacher's Lounge, Toilet leh Store Room awmin, Second Floor-ah Assembly Hall, Store Room leh Toilet dah a ni bawk a. Hei bakah hian sum dang hmangin a hnuaiah hian Multipurpose Hall chu sak belh a ni bawk. 

Nimin a Serchhip DIET Institutional Building hawnna inkhawm hi Esther Lalruatkimi, School Education Commissioner & Secretary chuan a kaihruai a. Serchhip DIET Principal, Lalrammawia chuan DIET chungchang report pein Lalruatkima, SE, PWD, Project Circle Aizawl hnen a\angin DIET Institutional Building sak dan chungchang ngaihthlak a ni bawk.

DIET Serchhip hi sawrkar laipui-a Ministry of Human Resource Development in kaih-hruaina a siam angin Sept. ni 5, 2003 khan din \an niin. April ni 22, 2016 khan hawn a ni a. Kum 2013-ah MHRD Meeting phalna in DIET puitling a hlankai leh niin kum 2016 July khan Pre-Service D.El.Ed kalpui \an a ni a, tunah hian he hmun a\ang hian In-Service leh Pre-Service (regular) zir zo tawh mi 171 a awm bakah IGNOU Study Centre anih angin In-Service Teacher (IGNOU) hnuaiah mi 180 in an zirchhuak tawh a. Tunah hian Zirlai 65 an awm mek a, anni bakah hian NIOS kaltlangin private school-a zirtirtu thawk lai mi 160 in an zir mek bawk. Tun dinhmun ah thawktu mi 34 awmin Teaching faculty ah Principal 1, Lecturer 19 leh computer zirtirtu khawihtu 1 awmin, Support Staff (Non-Teaching Staff) 13 an awm bawk.