MNF East Block Serchhip buatsaihin Serchhip-ah Martar te Ni urhsun taka hman a ni

MNF Party chuan nimin khan Mizoram hmun hrang hrangah ram leh hnam tana nunna hlantute hriatrengna Ni, Martar Day vawi 32-na an hmang a, Serchhip-ah pawh Serchhip Bazar-ah Martar te Hriatrengna lungphun ah zahna pangpar dah a ni.

MNF East Block Serchhip buatsaiha Martar te Ni puala inkhawm tawi Serchhip Bazar-a neih hi MNF East Block Serchhip President, T. Zadingliana chuan kaihruaiin Vanlalruata chuan hunserh a hman bakah Martar te Hriatrengna Lungphun-ah hian MNF East Block Serchhip leh Group bakah Unit hrang hrang te leh PAMRA Saizahawla District, Serchhip ten Pangpar dahin Assembly inthlanpui neih tura Serchhip biala MNF Candidate tur, C. Lalramzauva pawhin pangpar a dah bawk a, ram tana nunna hlantute sunna atan ngawi rengin minute khat (1) an ding bawk.

He hunah hian MNF East Block Serchhip Adviser, LP. Lalsanglura chuan thu sawiin ram tana nunna hlantu hriatrengna Ni hmang theia an awm chu lawmawm a tih thu a sawi a, ram leh hnam tana nunna hlantute chuan Mizo ram leh hnam chu a dinkhawchhuah theihna turin an thisen leh nunna ui nei hauh lovin an hlan tih a sawi a. Chutianga ram leh hnam tana nunna an hlanna kawngah chuan thupui pawimawh tak, ‘Pathian leh kan ram tan’ tih thupui an ken reng thu leh Pathian chu a hmasa berah dahin kan ram chu pahnihna ah leh anmahni chu a hnuhnung berah an indah \hin thu a sawi a, hei hi tuna \hangthar te pawhin an hriat reng a pawimawh thu a sawi a. Hnam sipai te chuan Mizoram chu Pathian leh a lalna ram ni tura humhalh tumin, ringlo mite kut a\anga lakchhuaha zalenna famkim nei turin kum 1966 a\angin hma an lak thu pawh sawiin, hemi atana penchhuak zinga chhan hrang hrang avanga nunna chan te chu Hnam Martar an nih thu leh Hnam Martar ti-a sawi chu an phu ngawih ngawih thu a sawi bawk.

Serchhip-a Martar Day puala inkhawm tawi neih ah hian Peace Accord MNF Returnee Association (PAMRA) Saizahawla District Serchhip aiawhin Varhmingthanga pawhin thu sawiin Martar te Ni-ah PAMRA te hriat an ni chu lawmawm a tih thu a sawi a. Remna leh muanna avanga rawn haw hi tun dinhmunah Serchhip khawchhungah mi 20 an awm thu leh District chhung khaw dang East Lungdar-ah 3, North Vanlaiphai-ah mi 2, Lungkawlh, Bungtlang leh Chhiahtlang-ah mi 1 awmin mi 5 an boral tawh thu a sawi a. PAMRA chu kum 2002-ah din a nih thu leh Serchhip District-ah pawh kum 2009 khan din a nih thu sawiin, Martar te chu an hriatreng thu leh he Ni-ah hian zahna an hlan thu a sawi bawk.