Serchhip Hmar Veng to Kikawn Road laih tlang a ni

Serchhip Bazar atanga Serchhip Hmar Veng kaltlanga Kikawn thleng pawh tur kawng thar siam tur chu nimin khan laih tlang niin kawng thar erawh siamthat ngai neuh neuh ala awm thung.
Serchhip khawpui tlak lama Serchhip Hmar Veng kaltlanga Kikawn pawhna tur kawngpui sial hna hi NABARD sum hmangin ‘Improvement of Kikawn to Hmar Veng, Serchhip’ tia ruahman a ni a, he hna thawh tur atan hian New Serchhip Kikawn atangin tlaklam-a kawng awmsa zawhin Daiduk ram lamah rawn kal zelin Serchhip Hmar Veng, Sports Complex panna kawng atanga Leisang Veng lam penna ah a rawn chhuak dawn a, he hna thawh tur atan hian Studio Hamlet, Champhai Vengthlang nen Agreement ziah niin Agreement Amount chu Rs. 15,51,98,719.23 a ni a, kumin May 14 khan hna hi tan tura ruahman niin March 14, 2027-ah zofel tura beisei a ni a, amaherawh chu Fur ruahtui tla avanga hna hi tan mai theih a nih loh hnuah ruahtui hul hnuin chak taka hmalak nghal a ni a, nimin tlai khan kawng hi laih tlang a ni ta a ni.

He kawng thar hi meter 6-a zau tura ruahman niin Blacktop zau zawng chu meter 3 ni tura ruahman a ni a, he kawng hi KM 6-a thui tur niin kawng laih turah hian zangnadawmna pek theih a nih loh avangin he hna thawhna tura khawtlang hruaitu, VC hrang hrangte chuan nasa takin hma an la a ni.