Ayushman Bharat-Pradhan Mantri Jan Arogya Yojana chu Mizoram-a kalpui turin hawn a ni ve ta

Chief Minister, Lal Thanhawla chuan nimin khan khawvela Health Care Scheme lian ber Ayushman Bharat-Pradhan Mantri Jan Arogya Yojana (AB-PMJAY) chu Mizoram-a hman turin a hawng a. He scheme hi Rashtriya Swasthya Bime Yojana (RSBY) thlakna tura duan a ni.

Mizoram-a Ayushman Bharat-Pradhan Mantri Jan Arogya Yojana (AB-PMJAY) kalpui tura hawnna hun Chief Minister’s Office Conference Hall-a neihah hian Chief Minister, Lal Thanhawla chuan AB-PMJAY kalpui a ni tur chu lawmawm a tih thu sawiin, ramin a chhunga chengte hriselna a ngaih pawimawhzia a tilang a ni, a ti a. Mizoram-ah pawh Health Care chu sawrkarin a ngaihpawimawh thu sawiin, sawrkar laipui scheme kalpui mekin a huamloh te chhawmdawl an nih theih nan Mizoram Health Care Scheme kalpui a lo nih tawh thu a sawi a, tunah AB-PMJAY nen Mizoram Health Care Scheme chu thlunzawm a ni thei tur chu a lawmawm hle a ni, a ti. Chief Minister chuan Health care Scheme thar chu a mamawh leh scheme hnuaia awm thei ten zau zawka an hriat a an hman \angkai ngei a duh thu a sawi a. Sawrkar pawhin a tih tur chin te pawh ngawrh taka hmaa lak zui tur a sawi a. Chutihrual chuan hriselna lamah Mizo mipuiten hmalakna tur kan nei tam hle a ni tiin, hnam hrisel zawk kan nih theih nan mitinin kan theih tawka kan ei leh in kan uluk a, zuk leh hmuam laka kan filhlim a pawimawh hle a ni, a ti bawk.

He hunah hian Health Minister, Lal Thanzara chuan ram mipuiin hriselna \ha zawk kan neih theih nana Health Care Scheme changkang leh sum leh pai tam zawk hman theihna, India Sawrkar laipuiin a duan thar chu kan chhawr \angkai ve theih dawn avangin hriselna lam kawnga hun pawimawh leh mellung pawimawh tak dang kan phun lehna ni a ni tih sawiin, Hriselna chu hmasawnna tehfung pawimawh a nih thu mithiam te pawhin an sawi \hin thu a sawi a. Ram changkangte an changkanna chhan ber pakhat chu mipui hrisel avang leh Health Infrastructure hrang hrang an neih \hat vangte, Health Insurance in mipuite a huam kim vangte a nih thu a sawi a. AB-PMJAY chuan natna hrang hrang a huam mai bakah, India ram hmun hrang hranga Empanelled Hospital-ah te hman theih a nih dawn avangin inenkawlna lama harsatna tawkte pawh a awlsam phah a beisei thu a sawi bawk.

AB-PMJAY scheme thar hnuaiah hian chhungkua pakhatin kum khatah cheng nuai 5 thleng damdawi In-a an inenkawlna senso an bill thei dawn tawh a. He scheme hi Sawrkar laipui chuan September ni 23, 2018 khan a tlangzarh \an a, Mizoram-ah pawh October ni 1, 2018 a\anga hman theih nghal tura ruahmanna kalpui mek niin Mizoram State Health Care Society, Department of Health & Family Welfare in a keng-kawh ang. 

AB-PMJAY thil tum zingah Damdawi In-a inenkawlna hautak avanga harsatna tawh \hinte chhawk zangkhai turin leh tun aia mipuite sum sen tih tlem zawk te; Awlsam zawka mipui ten damdawi Ina inenkawlna \ha zawk an lo neih theih na tur leh a hma aia sum hman tur tihsan te a ni a. AB-PMJAY hmang thei turte chu Socio Economic Caste Census 2011 List-a tel chhungkua te, RSBY Smart Card hmang mek chhungkuate leh Mizoram Sawrkar hmalakna a Mizoram Health Care a inziaklut tawh sa chhungkuate leh kumin October chhung a inziak lutte an ni. 

AB-PMJAY Scheme-ah hian natna chi hrang hrang 1390 chuang inenkawl theihna tur leh a zat (rate) bituk sa (package rate) a awm dawn a, heng package rate hian investigation man, damdawi man, in zai senso, chaw, Nursing senso, Doctor Visit senso, etc. a huam tel ang. 

RSBY leh Health Care hnuaia chhungkaw member tam lam zat limit (5 chin) awm \hin chu tih tawp a ni a, Damdawi In-a inenkawl hian pawisa hman ngai lovin a bathlau (cashless) a inenkawl theih a ni tawh dawn a ni.