Assembly inthlanpui buatsaih turin Serchhip District a inpeih tawh - DEO

Serchhip District Bawrhsap leh District Election Officer, Sangchhin Chinzah chuan Mizoram Legislative Assembly inthlanpui buatsaih turin Serchhip District chu a inpeih tawh thu sawiin, inthlanna felfai leh thianghlim kan neih theih nana thawhho puiah Political Party te chu a sawm bawk.

Nimin chawhma lam khan District Election Officer, Sangchhin Chinzah ho hian a Pisa-ah Serchhip District-a Political Party hrang hrang aiawhte leh tlawmngai pawl te chuan inhmuhkhawmna neiin Mizoram Legislative Assembly inthlanpui kan hmachhawn mek atana thawhho dan turte sawiho a ni a, he hunah hian District Bawrhsap, Sangchhin Chinzah chuan he inhmuhkhawm a huaihawt chhan sawiin, inthlanpui neih tur buaipuitu sawrkar hnathawk ten theihtawp chhuaha hma an lak mek te chu langtlang leh felfai a ni em, a thianghlim tawk em? tih te hmuhpuia vilpui turin Political party hrang hrangte leh tlawmngai pawl te an duh tih a sawi a. Ralkhat a\anga thutak hrechiang si lova rinthu leh phuahchawp mai hmanga mipuite leh hnathawktute chhaih buai mai mai lovin, a hmun ngeiah engkim hmuhpui ve \hin turin a sawm a ni.

District Election Officer chuan inthlanpui lo awm tur hi thianghlim, felfai leh langtlang taka neih a nih ngei theih nan party hrang hranga hruaitute chu thawhpui ah a sawm a, inthlan chungchanga sawiho tur leh zirho tur awm reng rengah phur taka telpui zel turin a ngen a. “Inthlan hmachhawn tur hian a thawktu lam chu kan in peihfel tawh a, eng hunah pawh inthlang ila, felfai leh thianghlim taka inthlanna neih ngei hi kan duh ber chu a ni,” a ti bawk.

He hunah hian Congress, MNF, ZPM leh BJP aiawhte telin tlawmngai pawl a\angin YMA, MUP leh MHIP aiawh an tel a, Official lam a\angin Serchhip Addl. DC, Chuauhnuna, SDO (Sadar), R. Vanrengpuia, Election Officer Lal-venhima leh Thenzawl-a SDO (Civil), Pinky Zosangpuii leh East Lungdar-a BDO, Dorothy Muansangi te pawh an tel a. He hunah hian Assembly inthlanpui neih tura Political Party te tana hriattur pawimawh hrang hrang sawiho a nih bakah inhrilhfiah nghal a ni bawk.