Larsap hovin Connectivity chungchang sawihona nei

Niminpiah tlai khan Mizoram Larsap, Kum-manam Rajasekharan hovin Raj Bhawan Durbar Hall-ah Mizoram chhunga connectivity, a bik takin internet connectivity chungchang meeting pawimawh tak neih a ni.

He meeting Commissioner & Secretary, Information & Communication Technology, Vanlalchhuanga kaihhruaiah hian Larsap chuan Mizoram chhungah hma-sawnna \hanmawh bawk ber chu inkalpawhna leh inbiakpawhna chhia (poor connectivity) a nih thu sawiin, tun dinhmunah sawrkar laipui bultuma Telecom leh Internet Connectivity Project hrang hrang kalpui mekah eng chen nge hlawhtlinna an nei tawh leh harsatna te an tawhte sutkian dan tur ngaihtuahho tura Meeting hi koh a nih thu a sawi a. Heng project kaihhnawih department hrang hrangte inkarah inhriattawnna leh thawhhona \ha leh langtlang tak neih a \ul thu leh hna kal lai mekte chu vil \hat a pawimawh thu a sawi a. Mizoram Governor a nihna angin state chhunga hmasawnna tur ruahmanna hrang hrang kalpui mekte chu zirchian a duh thu pawh sawiin Larsap chuan thla 3 dan velah Connectivity chungchang ah Review Meeting ko ziah turin a hrilh bawk.

He Meeting-ah hian service provider hrang hrang BSNL, Airtel, RailTel bakah State Bank of India ten tun dinhmuna an hmalakna tawhte leh an hmalakna kal mek hrang hrangte report an pe \heuh a. Sawrkar laipui project kalpui mek hnuaiah Mizoram District 8 bakah RD Block leh Village (khua) thlengin thlunzawm vek tum a nih thu an sawi a, kawng \halo te, leimin \hin te leh khawchhiat zin avangte in hnathawh chak a har thu an sawi a. Tunah hian Power & Electricity Department nen Optic Fibre thlun nan an electric bante hmang \angkai theih dan tur an ngaihtuahho mek tih thu meeting-ah an tarlang bawk.