Mizoram State Anti-Tobacco Day 2018 hman a ni

Nimin khan Mizoram hmun hrang hrangah Mizoram State Anti-Tobacco Day vawi 5-na hman a ni a, he Ni puala inkhawm lian ber Aijal Club Conference Hall-a neih chu Transport Minister, John Rotluangliana chuan a hmanpui a ni.

Nimin a Aijal Club Conference Hall-a he Ni puala inkhawm ah hian John Rotluangliana chuan meizuk nghei lamah hma kan sawn nasa hle tih sawiin, hei hi sawrkar leh pawl hrang hrang hmalakna rah a ni, a ti a. Motor Vehicle Rules 1989 Rules 21 (14) chuan lirthei chhunga meizuk a khap thu leh Motor Vehicle Rules 1995, Section 23 (B) chuan lirthei khalhtute meizuk a khap tih pawh sawiin, he dan bawhchhe tan chuan pawisa chawi theih a nih thu leh an licence thleng laksak theih an ni tih a sawi a. Sawrkar laipuiin Road Safety chungchang an ngai pawimawh hle a, Committee din hial niin lirthei khalhtu in meizu chunga lirthei a khalh hi an ngaimawh hle a ni, a ti.

He huna tarlan danin Vaihlo dona kawngah hian hmalakna tam tak neih a ni tawh a. Chung zingah chuan Mizoram State Tobacco Control Society (MSTCS) chu April ni 1, 2009 khan din niin hemi kum vek hian Smoke Free Mizoram kalpui a ni a. February ni 10, 2010 khan Anti Tobaco Squad din a ni a. Kum 2011 khan District leh State Level-ah Anti-Tobacco Cell din leh a ni a. Vaihlo dona chikhat Blue Ribbon Campaign chu kum 2012 khan kalpui a nih leh bakah September ni 30, 2013 khan State Level Coordination Committee din leh niin August ni 26, 2013 khan Thingsul Tlangnuam chu Tobacco Free Village hmasa ber atan puan a ni a. Kum 2014 khan 1st Mizoram State Anti-Tobacco Day buatsaih niin kum 2016 khan Point of Sale Board (PoS) Free Mizoram kalpui \an a ni bawk.

Global Adult Tobacco Survey (GATS) report tarlan danin kum 2009-2010 khan Mizo-ram-ah 67.2% meizu an awm a, kum 2016-2017-ah chuan 58.7% an awm a ni.