Mizoram Lok Sabha MP thlanna chuh turin mi 6 ten an hming an pelut

Thla thar April 19-a Mizoram Lok Sabha Inthlanpui neih tur chuh tumte tana hming pekluh hun chu nimin tlai khan a tawp ta a, he inthlanna chuh tur hian mi 6 ten Nomination paper thehlutin heng te hi Vawiin hian enfiah a ni ang.

Mizoram in Lok Sabha-a Seat pakhat a neih hnawhkhahna tura Election Commission of India in thla thar April 19-a inthlanna nei tura ruahmanna a siam anga Inthlan chuh tum te tana hming pekluhna ni hnuhnung ber nimin khan Mizo National Front (MNF) Candidate K. Vanlalvena, Congress Candidate Lalbiakzama leh BJP Candidate Vanlalhmuaka te chuan inthlanna chuh turin an hming an pelut a, hemi hma niminpiah khan PC Party MP Candidate Rita Malsawmi leh Independent-a chuh tum Lal Hriatrenga Chhangte te chuan an hming pelutin hemi hmalam hian ZPM Candidate Richard Vanlalhmangaiha chuan hming a lo pelut tawh bawk a ni.

Heti hian Mizoram Lok Sabha Inthlanpui lo awm tur chuh tura hming pelut chu mi 6 niin an zinga panga (5) te chu Political party behchhan neia chuh tur niin mi pakhat chu Independent a chuh tur a ni thung a. Inthlan chuh tuma hming pelut te hi Vawiin hian an Nomination Paper enfiah sakin naktip Inrinni, March 30, 2024 thlengin inhnuhdawh theihna hun hawn a ni ang.

Mizoram Chief Election Officer (CEO) Madhup Vyas chuan Lok Sabha inthlan neih chhoh mek leh thla thar ni 19-a vote thlak turah inthlan muanawm leh felfai a awm theih nana thawhpuiah Mizoram mipuite a sawm a. Tun thla ni 16 atang khan Model Code of Conduct (MCC) chu Mizoram-ah hman tan a nih thu te, hemi dan pela kallui te chu dan hmanga hrem theih a nih thu te, MCC hman tan anih atang hian Party Candidate, Party hrang hrang bakah sawrkar hnathawkte chu danin a huam chin baka che lo turin a ngen a ni.

Lok Sabha inthlanpuiah hian Mizoram-ah vote nei mi 8,61,277 an awm mek a, Polling Station 1,276 a awm dawn a, Vote thlakna atan EVM/VVPAT Model thar ber M3 chu hman tur niin. ECI chuan VVPAT leh EVM thahnem tak a rawn dah tawh a. First Level Checking (FLC) neih tawh niin Ballot Unit 2,158, Control Unit 2,195 leh Voter Verifiable Paper Audit Trail (VVPAT) 2,228 te chu hman mai theih turin venhimna hnuaiah dah a ni tawh a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar