Thinglian pan Pik-Up chesual-ah nausen a thi

Serchhip atanga Thinglian pan Pik-Up Truck pakhat chu nimin tlai khan Khawlailung leh Tuichang lui inkar-ah chesualin he Motor-a chuang mi 7 zingah nausen chawlhkar hnih mi vel chu vanduaina thlenna hmunah a boral a, hliam tuar zingah naute nu leh midang pakhat chu Serchhip a enkawl tura rawn lak an ni.
Thinglian Branch YMA President Zonunsanga Ralte hnen atanga LENKAWL in thu a dawn danin he Motor MZ-01U/0201 hi Hramliana, Thinglian a mi ta niiin a fapa C. Zoramchuana chuan a khalh a, nimin khan Serchhip atangin an khaw mite In sakna bungrua chu Thinglian-ah hian phur hawin hemi rual hian an khaw pan tur mi 6 an chuang ve bawk a, Khawlailung leh Tuichang inkar kawng chhuk takah an tlan laiin Motor hi a break a fail a, driver hian kawng thlanga tlanliam lo tura theihtawp chhuahin ko pang a nawr hnuah kawng-ah Motor hi a let a ni.

He vanduaina thleng ah hian Motor a chuang mi 7 zingah Lalrammuana chu a hmunah a boral a, Lalrammuana hi Lalnghakmawii fapa niin tun thla ni 4 khan Lunglei-ah a piang a, an khaw pana an hawpui laiin vanduaina thlengah hian a boral zui ta a ni. He lirthei chesual ah hian nausen boral ta nu Lalnghakmawii bakah lirthei khalhtu C. Zoramchuana u, Lalbiakfeli leh a Ni (Lunglei lam mi, a hming la hriatchian loh) te chuan hliam na deuh an tawrh avangin Khawlailung damdawi In panpui an nih hnuah nizan khan Serchhip damdawi In rawn panpui an ni a, midang pahnih hliam tuar te erawh ngaihtuahawm an ni lo nia thudawn a ni. Vanduaina a boral Lalrammuana ruang hi nizan vek khan Khawlailung atangin Thinglian-ah hian lak nghal a ni.