Tuichawng bialtu MLA insawifiah turin hriattir

Mizoram Legislative Assembly Speaker chuan Tuichawng Bialtu MLA Rasik Mohan Chakma chu MLA atanga ban a nih loh chhan tur April 15, 2024 hmaa insawifiah turin a hriattir.

Mizoram Legislative Assembly Speaker Lalbiakzama hian tun thla ni 22 khan Tuichawng bialtu MLA Rasik Mohan Chakma hi insawifiah tura hriattirna hi pein Chakma Autonomous District Council (CADC)-a MDC Doymoy Daveng Chakma hnen atangin CADC CEM leh MLA a nih kawp chungchangah Complaint a dawn thu a tarlang a. The Mizoram Union Territory Legislature Members (Removal of Disqualification) Act, 1975-ah ADC-a CEM, Executive Member, Chairman leh Vice President chu MLA nih phal mah se, The Mizoram State Legislature Members (Removal of Disqualification) (Amendment) Act, 2006-in CADC-a CEM chu MLA a nih a phal loh avangin dan a bawhchhiat thu Rasik Mohan Chakma hi hriattirin, MLA atanga ban a nih loh chhan tur sawifiah turin a hriattir a. April 15, 2024 hma-a insawifiah turin a ti.

MLA inthlan hnuhnung ber nikum-a neih ah khan khan Rasik Mohan Chakma hi CADC CEM ni chungin Tuichawng Bial atangin MLA atana thlantlin a ni a, tunah hian CADC-a CEM leh MLA nihna hi chelh kawpin Dan a bawhchhiat loh thu hmanga chhanlet a tum tih a sawi a ni.