Kan ram, kan hnam leh kan Sakhua himna turin Candidate atan ka lo penchhuak - K. Vanlalvena, MNF

Lok Sabha Inthlanpui neih tura MNF Candidate K. Vanlalvena chuan Lok Sabha Inthlanpui-ah thlantlin a nih chuan State sawrkar chu Mizoram hmasawnna atan theihtawp a chhuahpui tur thu sawiin, “MNF party bil tana tlangau tur ni lovin, kan ram, kan hnam leh kan Sakhua himna turin Candidate atan ka lo penchhuak a ni,” a ti.

Lok Sabha Inthlanpui neih tura MNF Candidate K. Vanlalvena hian Ningani khan Serchhip Bazar-a Street Campaign-ah thu sawiin hemi hnu hian Serchhip Press Club-ah thuthar thehdarhtute a kawm nghal bawk a, he hunah hian K. Vanlalvena chuan Rajya Sabha MP a nih chhunga a hmalakna thenkhat te sawiin, tunah hian Lok Sabha MP atan thlantlin a nih chuan Mizoram hmasawnna atan tuna State sawrkar chu a theihna zawng zawngin a thawhpui dawn tih a sawi a. Lok Sabha MP atan thlantlin a nih chuan tuna a thut mekna NDA Seat-ah a thut tur thu pawh sawi nawn lehin, NDA chu Congress leh an thurualpui party te intelkhawmna UPA paihthla tura din anih thu leh MNF pawh NDA dintu zingah a tel thu a sawi a, NDA chhunga BJP hmalakna avangin Kristianna a chep tih chu amah pawh a taka hretu anih thu sawiin, “India ramah Hindu Nationalism a lian zel a, chu chu BJP in politics khelh nan an hmang a, hei hi NDA chhunga awm Christian MP ten na taka an dodal zel a tul a ni,” a ti a. BJP chak chho zelah a hlanga sawrkar siam theihna khawp MP an neih leh ngei hmel nia sawi bawkin, Hindu kulmuk hlangin ro an rel lohna turin Kristian MP te chu an tel ve rih tlat a ngaih thu leh Tribal te dikna leh chanvo humhalh zel turin NDA-ah an thu lui zel dawn zawk niin a sawi bawk.

K. Vanlalvena chuan Lok Sabha MP thlanna neih turah Zoram Mipui Candidate ni tura a rawn penchuah thu sawiin, tawng chungchang ah Parliament-a tlangau turin vai tawng thiam emaw, Sap tawng thiam ngawr ngawr chu a pawimawh hran vak lo tih a sawi a, tuna Rajya Sabha MP a nih mek chhungin vawi 15 thu a sawi tawh thu leh Translator ten lo letin an hriatthiam theih tura an lo lehlin sak zel thu a sawi bawk.

K. Vanlalvena chuan a hausakna pun thu ah sawrkar in MP a nih hnuah Inhmun a pek thu leh Kuhva huan a siam tak avanga a lo pun tak thu a sawi a. MP Fund hmanna chu tumahin an tlang-zarh ngai loh thu leh a hre duh tan RTI hmanga zawh theih a nih thu a sawi a. A hman diklohna hria chuan sawi se a duh thu a sawi bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar