Kohhran ten urhsun takin Good Friday an hmang

Nimin March 29, 2024 kha Kristian te ni pawimawh ‘Good Friday’ niin Kohhran hrang hrangte chuan he ni hi urhsun takin an hmang a ni.
Mihring te tlan tura Isua Krista Kros-a khenbeh a nihna ni, Good Friday pual hian Ningani zan atang khan Kohhran hrang hrangte chuan hun hmangin Koh-hran tam ber chuan Inkhawmna neia hun an hman bakah Lalpa Zanriah Sakrament an kilho a, Koh-hran thenkhat chuan Ke sil rawngbawlna te neiin hun an hmang bawk a ni. Nimin Good Friday kha Kohhran hrang hrangte chuan Pathianni anga serhin chawhma, chawhnu leh zan lamah Inkhawm an nei a, thupui thlan hrang hrang hmangin Pathian thuchah ngaihthlak a ni bawk.


Catholic Kohhran chuan Good Friday pual hian Isua Krista tawrhna an tawmpui tih lantir nan nimin khan chaw an nghei bakah Serchhip Bazar atanga Serchhip P&E Veng-a Assumption Church thlengin Kross kawngzawh an nei a, Biak In-ah Kros Chawimawina Inkhawm an nei zui nghal bawk a ni.

Prime Minister Narendra Modi chuan Good Friday pual hian Kristian Sakhaw zuitute chu Chibai bukin, “Lal Isua Krista tawrhna, inpum-pekna leh a zirtirna kan hre reng,” a ti a. Lal Isua'n khawngaihna leh ngaihdamna min zirtirna hmangin mitin in chakna an hmuh ngei a beisei thu a sawi tel bawk.

Naktuk Pathianni hi Isua Krista Thihna hneha a thawh lehna ni, Easter Sunday a ni bawk a, he ni pawh hi Kohhran hrang hrang ten urhsun takin an hmang leh dawn a, zingkar-ah Kohhran thalai ten thu leh hla leh rimawi hmanga Isua thawh-lehna thu puangin chhun leh zan-ah te Inkhawmna neih chhunzawm a ni bawk ang.

Comments

Popular News (Last 30 Days)

Vawiin-ah HSSLC Exam result

LPG man bithliah thar