BJP in Lok Sabha Inthlana an Candidate tur puangin Candidate 6 an awm dawn niin a lang

BJP Mizoram chuan Lok Sabha Inthlanpui neih turah an President Vanlalhmuaka chu an Party Official Candidate a ni dawn tih nimin khan an puang a. Heti hian Mizoram-a Political Party ten an Candidate tur puang kimin MP candidate hi mi 6 an awm dawn niin a lang.

BJP Mizoram hian nimin khan Aizawl a an party Office-ah Lok Sabha MP Inthlanpui lo awm tur atan BJP Mizoram Official Candidate puanna leh Pathian hnena inhlanna hun hmangin he hunah hian State Core Group Member Lalramtiama chuan Lok Sabha MP Inthlanpui atana BJP Official Candidate chu Vanlalhmuaka a nih thu a puang a, “Mizoram leh mipuite'n malsawmna kan neih theihna tur leh Mizorama Party hrang hrangin MP Candidate kan neih ho zingah chuan MP Mizoram tana tha ber tur kan nei a ni,” tiin Mizoram Sawrkar leh Sawrkar hnathawk te, thalai te tana hnathawh tur tam tak kan neih theihna turin an MP Official Candidate hi Vote pui turin Mizoram mipuite a sawm bawk a ni.

He hunah hian BJP Candidate tur Vanlalhmuaka chuan NE State-a Kristian State kan tih ho ah BJP leh Tualto Party-te Sawrkarna a awm zel tih sawiin, chung State-a an thawhpuite nen chuan MP intawm nei mah se keini State-ah erawh BJP te chuan thawhpui nei lovin anmahni in an ding dawn tih a sawi a. “Central ah ngampa tak leh huaisen taka Mizoram mamawh kan sawichhuah theihna turin BJP MP hi a pawimawh a, MP kan neih tawhte hmalakna en in BJP MP emaw, BJP leh a thawhpui MP an nih loh chuan thil tih a har hle a ni tih a chiang a ni. Chuvangin Mizoram tan, Mizorama Sawrkar mek tan, Mizoram mipui tan BJP MP neih hi a pawimawh hle a ni,” a ti bawk.

BJP President chuan Mizoram MP a nih chuan Mizoram tana hma a lo lak tawhna te a taka tihhlawhtlin a nih theih nan hma a la dawn tih pawh sawiin, “Tunah hian MP Candidate tha tak tak Party dang dangin kan nei hlawm a, mihring mihrinna ah chuan kei aia fel te an ni hlawm ngei ang. Nimahsela Vawiin-a Mizoram in MP Mizoram tana kan mamawh erawh chu Mizoram mamawh sawichhuak thei MP a ni thung a, BJP MP Mizoram in kan nei a nih ngat chuan Central ah Pathian zarah BJP kan Sawrkar leh ngei dawn bawk avangin Mizoram mamawh sawi chhuak thei tur erawh chuan kei aia nawr-chhuak thei chu an ni lo thung dawn a ni,” a ti a. “Chuvangin Mizoram-in sum leh pai leh thil danga kan harsat mekna te sutkian a nihna turin min thlang tling ula, kan thusawi hi a takin mipuiin a rah kan seng ngei dawn a ni,” a ti bawk.

BJP in nimin-a Candidate an puanna hun hi an Party State Vice President Vanupa Zathang, IPS (Retd) chuan kaihruaiin an party hruaitu then-khat te pawhin thu an sawi bawk a ni.

Heti hian Mizoram-a Political Party hrang hrangte chuan Lok Sabha Inthlanpui neih tura an Candidate tur an tichiang kim ta niin a lang a, State sawrkar-a rorellai ZPM Party chuan Richard Vanlalhmangaiha chu an Candidate tur a nih thu puangin Nomination a File tawh a. MNF in Rajya Sabha MP nilai K. Vanlalvena chu an Candidate tur a nih thu puang tawhin INC in Lalbiakzama leh PC Party in Rita Malsawmi a din tur thu an puang tawh a, BJP in Candidate tur an puan bakah hian Independent in Lal Hriatrenga Chhangte chuan din a tum nia thudawn a ni bawk.

Election Commission of India in rua-hmanna a siam dan chuan Mizoram Lok Sabha inthlanpui neih tur chuh tumte tan hian naktuk, March 27, 2024 thleng khian hming pekluh theih a ni dawn a, nimin tlai thleng khan ZPM Party atanga chuh tur Richard Vanlalhmangaiha  chuan hming pelut tawhin Vawiin hian PC Party in an Candidate tur Rita Malsawmi; INC Candidate tur Lalbiakzama leh Independent Candidate tur Lal Hriatrenga Chhangte te chuan hming pekluh an tum ve leh bawk a ni.