Political Adrvertisement dilna lut ngaihtuah a ni

State-Level Certification Committee (SLCC) chu nimin khan State Media Centre-ah thukhawmin Lok Sabha inthlanpui lo awm tur kaihhnawiha Political Adrvertisement Pre-Certification dilna lut hrang hrang te an thlirho.

Lok Sabha Inthlanpui neih turah hian Electronic Media kaltlanga Political Advertisement chhuah tur nei te chuan Election Commission of India-in a din Media Certification and Monitoring Committee (MCMC) hnenah chhuah phalna (Pre-Certification) an dil hmasa zel tur a ni a, Electronic Media hian Social Media pawh huamin TV Channel/Cable Network, SMS/voice message, Cinema Hall, Radio & Private FM channel, Vantlang hmuna Audio-Visual Display, Internet leh Social Media Website-a Political Advertisement tihchhuah turah chuan Pre-Certification tih zel a ngai a. Nimin-a thutkhawm hi Media Cell-a Nodal Officer H. Lianzela chuan kaihruaiin Political party pakhat atanga Pre-Certification dilna lut chu endik a ni a, Election Commission of India in dan leh hrai a zam te zawm a ni em tih endik niin, dan pela thil tih a awm loh avangin thurawn tlem siamin pawm a ni.

Candidate hming leh hamthatna tura advertisement siam reng rengah chhuah phalna District Level MCMC hnenah dil hmasak tur niin, Party leh pawl State Hqrs. a awmte tan State Level MCMC, Addl. CEO kaihhruaiah dilna thlen tur a ni a. Candidate/Party-te tan chhuah hun tur thlen hma ni 3-ah dilna thehluh hman a ngai a, mimal/pawl tan erawh chhuah hun tur thlen hma ni 7-ah dilna thehluh hman a ngai thung a ni. Dilna te hi ni 2 chhunga ngaihtuah zawh hman tur a ni a. Chanchinbu (Print media) kaltlanga chhuah turte tan erawh vote thlak ni leh a hma chiah ni atan Pre-Certification tih tur a ni a. Candidate remtihna a ni em tih finfiah tur a ni a, a remtihna nilova chhuahtu (publisher) chu Section 171H of IPC hmanga hrem theih a ni.

Political Adrvertisement-a dilna thehluh hmasak ngai ah hian mimal account/Blogs/Website/Social Media platform hrang hranga thuchah, thlalak dah, Comment, Video etc. a politics kaihhnawih tarlante chu chhiar tel a ni lova, party/candidate-in an chhuah chhawn pawhin Political Advertisement-ah chhiar a ni lo, Pre-Certification pawh tih ngai lovin Model Code of Conduct bawhchhiatna erawh a awm tur a ni lo.