Motor chuan man thar ah Consumer te chanvo
Motor chuan man thar ah Consumer te chanvo
- Laldinpuia
Mizoram Sawrkar, State Transport Authority chuan tunhnaiah khan Mizoram chhunga khualzin phur chi lirthei (Passenger Service Vehicle) hrang hrang te chuan man a bithliah thar a (Ref Memo No. F.20016/1/2024-DTE(STA) Dated Aizawl, the 12th March 2024). Hemi sawrkar ruahmanna thar ang chuan hetiang hi motor chuan man thar tur a ni –
1. 2 Wheeler Taxi - Km khatah Rs. 30, a hnulamah Km tinah Rs. 20 zel belh leh tur.
2. Auto Rickshaw - Km khatah Rs. 35, a hnu lamah Km khatah Rs. 25 zel belh tur.
3. Taxi - Km khatah Rs. 55, a hnu lamah Km khatah Rs. 45 zel belh tur.
4. Maxi Cab - Passenger pakhat tan Km khatah Rs. 3.50 Metalled road ah, Metalled road ni loah Km khatah Rs. 4.00.
Khi rate thar hmang khian khualzin phur motor tam tak chu an service hlawm tawh nghe nghe a ni.
Hetianga sawrkarin Motor chuanman rate a siam hi thil thar a ni lova, tunhma pawhin mumal takin sawrkarin rate hi a lo siam reng tawh thin a, amaherawh chu hmun thenkhatah sawrkar rate siam hi zawm that anih viau laiin hmun thenkhatah zawm a ni ngai lova. Hmun tam takah chuan Lirthei neituten pawl indinin pawlin a tha an tih ang angin rate hi an siam mai thin niin a lang a, hei hi a pawi hle a, hei hian mipuiah kawng hrang hrangin harsatna min siam sak fo thin a ni. Tunah pawh hian sawrkar rate thar siam hi lirthei neitu thenkhat a hma ang tho a zawm mumal duhlo an awm leh mai thei a, hetiang kawngah hian Consumer ten kan chanvo kan hriat a, sawrkar rate siam aia to a lirthei chuanman min laksak tumtute lakah kan chanvo humhalh nachang kan hriat a tul hle dawn a ni.
Sawrkar ina dan a siam hrang hrang te hi khua leh tui te hamthatna tur leh mipui te chungah rualkhai leh felfai taka rorelna kenkawh anih theih nan a ni a, chuvang chuan mipui te hian sawrkar dan siam te hi kan zawm a tul a, dan zawmlo an awm chuan thuneitute hnen lama complaint i hreh lovang u.
Tuna motor chuanman rate siam anih tak hnu hian mipuiah inhnialna leh sawi neuh neuh awm fo chu Kilometer zat chhut dan hi a ni a, tunah Serchhip ah ngei pawh Kilometer chhut danah ngaihdan inanglo a rawn piang nghal a. Thenkhatin Google map atangin an en a, thenkhat ah Mellung atangin an en a, thenkhatin sawrkarin permit a pekchhuaha Kilometer zat a pek atangin an en bawk a.
Google Map atanga enin Serchhip to Aizawl hi Km 94 a ni a, National Highway-ah Km 112 a ni thung a, Sawrkar Website lama tarlan dan pawhin km 112 a ni. Chutih laiin Transport Department in Sumo Permit an pekchhuaha an tarlanah chuan Km 114 a ni thung. Hetiang tehnuai hi anih avang hian State Transport Authority hian hetianga mumal taka rate thar an rawn tihchhuah takah chuan Mizoram khaw hrang hrang hlat zawng leh Kilometer zat an pawm dan/record dan hi mipuiah puangzar tel thei se a duhawm hle a, hei hian rate thar hman dik anih leh nih loh mipuiin kan lo en ve na kawngah min pui hle dawn a ni.
Tin, hetianga sawrkar in passenger phur lirthei te a kilometer bi a rate mumal tak a bituk takah chuan passenger phur lirthei Taxi leh Auto Rickshaw ah te hian Fare Meter hi vuah theih nise mipuiin a fare dik takin kan pe thlap thlap thei ang a, consumer lam tan chuan thil lawmawm tak a ni ang. Auto Ricksaw-a Fare Meter vuah tumna hi sawrkar hmasa lam khan ruahmanna a lo kalpui tawh a (F.20015/2/2018-DTE(STA) of 7/7/2022), Auto Rickshaw neitu lam khan an dodal nasa hle a, a hnuah engengemaw chhan hrang hrang vangin sawrkar khan kha order kha August 19, 2022 khan a cancel leh ta kha a ni a, kha order kha kengkawh tlang thei ila chu consumer te tan chuan a tha zawk fe in a rinawm.
Hetianga Motor chuanman thar bithliah anih takah hian Consumer ten kan chanvo hi kan hriat tlan ve a tul hle mai a. Sawrkar thuchhuak ang hi kan lirthei neituten an zawm em? Dik takin a rate mipuite min laksak em? tih hi kan chhut peih a ngai a, hemi tur hian mipui ten kan chanvo te humhalh ila, sawrkarin dan min siamsak hi zawm ila, dan diklo a thil ti an awm anih chuan thuneitute hnena thlen hi i hreh lovang u.
Comments
Post a Comment