Aizawl FC in I-League a hnehna an chan zan-ah Serchhip tlangval in record a siam

Tunhnaia che fuh hlei thei lo Aizawl FC chuan I-League Season kal mekah hnehna an chang ve leh ta a, Aizawl FC Player Serchhip tlangval Lalrinzuala chuan record thar a siam bawk a ni.

Mizoram atanga I-League Player awmchhun Aizawl FC hian nikum lamah Season hmang tha viau mah se Bobi Stojkoski hnuaiah Season chawhnu lam an hmang tha lo hle a, nikum December 10-a Shillong Lajong an hneh hnuah match 10 zet chak nei lovin an khel tawh a, vawi 4 an khingpui te nen inhnehtawkin vawi 6 chu a tlawm zawkah an tang a. Inrinni khan RG Stadium-ah Churchill Brothers mikhualin si li faiin an lo hneh a, match 10 hnuah hnehna changin tunhnaiah goal chhuah tam thin Aizawl FC tan goal an chhuah lo hi result tha tak tih theih a ni ang. He inkhel ah hian Serchhip tlangval Lalrinzuala chuan goal hnih khungin Lalthankhuma chuan goal hnih a khung bawk a ni.

He inkhel-a Aizawl FC tana goal hnih khungtu Lalrinzuala hian I-League Record thar siamin Season khat chhunga Indian Player zinga goal khung tam ber a ni ta a, Mohammed Rafi (2009–10) leh Sunil Chhetri (2013–14) te chuan Season khatah goal 14 ve ve khungin hei hi hun rei tak khumtu an awm loh hnuah Serchhip Bilzel tlangval Lalrinzuala chuan a rawn khum ta a, tun Season-a match 18 a khelh tawh atangin goal 15 a rawn khung tawh a, Rafi leh Chhetri te hian goal 14 thun nan match 23 an mamawh laiin Lalrinzuala hian match 18 chauh a mamawh thung a ni. Tun Season I-League ah hian mimal-a goal khung tam ber erawh Álex Sánchez niin goal 16 a khung tawh a, ani hi Spanish niin Rinzuala hian goal hnih chiah in a phak lo mek bawk a ni.

Heti hian Aizawl FC hian tun Season I-League ah match 20 an khelh atangin point 24 an hmu ta a, Table-ah 9-na ni mekin an dinhmun erawh a la tha lo hle a, Division hniam zawka an tlak rinawm chiah lo a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar