Serchhip District-a pawikhawihna thleng tuartute hnenah zangnadawmna sum pekchhuah a ni

Serchhip District chhunga pawikhawihna thleng tuartu mi 6 te hnenah nimin khan The Mizoram Victims of Crime Compensation Scheme hnuaiah zangnadawmna Rs. 15,25,000/- semchhuah a ni a, zangnadawmna semna hun hi District & Session Judge Joel Joseph Denga chuan a hmanpui a ni.

Serchhip District Legal Services Authority bultuma zangnadawmna semna puala inkhawm tawi Serchhip District Court-a neih ah Aizawl Judicial District-a District & Session Judge leh District Legal Services Authority, Serchhip District-a Chairman Joel Joseph Denga chuan The Mizoram Victims of Crime Compensation Scheme hnuaia zangnadawmna pekchhuah a nih dan te sawiin, heng zangnadawmna an pek hi vanduaina tawk te chhawmdawlna tur a nih thu leh sawrkar in rate mumal tak a neih atanga zangnadawmna sum hi pekchhuah a ni tih a sawi a. Zangnadawmna atan hian sum tam tak in pek theih ni lo mah se an pekchhuah ang ang chu tangkai taka hman nise a duh thu sawiin, tawhsual tawk te tana pek a nih ang ngeiin anmahni chhawmdawlna atan hman tur a nih thu leh vanduaina tawktu chu naupang an nih phei chuan anmahni chhawmdawlna atan hman ngei a pawimawh thu leh thildang leina atana lo hman daih chu tih loh nise a duh thu te a sawi bawk a ni.

Nimin-a zangnadawmna semna puala inkhawm hi District Legal Services Authority-a Member Secretary leh Serchhip-a Judicial Magistrate First Class Josangzeli Tlau chuan kaihruaiin tun tuma zangnadawmna an pek te hi kum November 4, 2020 khan District Legel Services Authority chuan a lo pawmpui tawh thu leh hri leng avanga semchhuah mai theih a nih loh thu leh nikum lamah sanction hmuin kar hmasa lawk khan sum hi an dawn hnuah semchhuah nghal a nih thu a sawi a. Zangnadawmna pek dan kalphung te a sawi bawk a ni.

The Mizoram Victims of Crime Compensation Scheme hi mi tu pawhin misual kut tawrh avanga ramtuileilova an awm in emaw, thihna an tawh in emaw an chhungte leh anmahni hnenah chhawmdawlna pekna tur niin Dan anga Police-a FIR thehluh a nih hnuah dil theih a ni a. Tun tumah hian Serchhip District-a pawikhawihna tuartu mi 6 hnenah chhawmdawlna sum hi pek niin a vaiin Rs. 15,25,000/- semchhuah a ni a, chhawmdawlna dawngtu mi 6 zinga pathum te hi naupang kum tling lo te niin anni hi zangnadawmna an dawn tur atanga zaa 20 pein a dang zaa 80 chu an Bank Account-ah thun sak an ni a, kum 18 an tlin hnuah lakchhuah theih a ni ang.