Serchhip District-a Polling Official ten Training nei tan

Lok Sabha Inthlanpui neih tura Serchhip District chhunga Vote nei ten Vote an thlak tur lo buaipuitu tur, Polling Officials te tana Training hmasa ber chu nimin khan Serchhip-ah neih a ni.
Serchhip District chhunga Polling Official te tana Training hmasa ber hi nimin khan Govt. Serchhip College-a Room hrang hrang 6-ah neih niin Presiding Officer, Asst. Presiding Officer leh Polling Officer ten a hrang theuhin Training hi an nei a, PRO te chu Lalhruailiana Zote leh Dr. Marilyn Lalruatkimi ten zirtirna pein APRO te chu Rebecca Laldin-mawii Hrahsel leh Dr C. Vanlalchhanhimi ten an zirtir a, PO te hi Lalbeisanga, Malsawmtluanga, Dr. Zarzosanga leh Vanlalsanga ten zirtirin an tih tur leh mawhphurhna hrang hrangte zirtir an ni a, hei bakah hian EVM enkawl dan te zirtir an nih bakah EDC hmanga Vote an thlakna turin Form Fill-up tir nghal an ni bawk.

Serchhip District chhunga Assembly Constituency pathum-ah hian Polling Station 88 awmin Election Commission of India in ruahmanna a siam angin Assembly Bial tinah hian hmeichhia te Duty na tur Polling Station pakhat theuh ruahman a ni a. Hei bakah hian Hmeichhe hlang Duty-na tur Polling Station dang 16 siam belhin a vaiin hmei-chhe hlang Duty-na tur Polling Station hi 19 a awm dawn a. Heng zinga pakhat hi Youth Polling Station atan ruahman niin Polling Officials zinga kum naupang thlanchhuah te an Duty dawn a ni. Heng bakah hian District pumah Model Polling Station pakhat siam leh a ni bawk ang.

Tun tum Lok Sabha Inthlanpui-a Polling Officials atan hian PRO-ah mi 107, APRO-ah mi 107 leh PO atan mi 214 ruatchhuah an ni a, Polling Party pakhat-ah PRO leh APRO pakhat ve ve leh PO pahnih zel an awm dawn a ni. Nimin a Training nei tur hian PRO 84, Women PRO mi 23, APRO 84, Women APRO mi 23, PO 168 leh Women PO mi 46 koh an ni a, Training hi tum thum neih tura ruahman a ni.