District Bawrhsap in tlawh

Serchhip District Bawrhsap leh District Election Officer David Lalthantluanga chuan nimin khan Serchhip District chhunga Polling Station thenkhat chu a hmunah tlawhina dinhmun te a enfiah.
Serchhip District Bawrhsap-in nimin-a Spot Verification a neih ah hian Vanchengte, Sialhau, Thentlang, Rullam, Lungpho leh Ngen-tiang khua te tlawhin inthlan hlawhtling taka neih a nih theihna tura Polling Station te inpuahchahna hrang hrang chipchiar takin a en a. Election Commission of India (ECI) in Polling Station tina awm ngei tura a bituk - a panna kawng mumal tak, kawlphetha leh tui thianghlim in tur hnianghnar, mipa leh hmeichhe inthiarna (toilet), ramp, furniture mamawh te, Mobile Connectivity leh Telephone (landline) te a awm ngei em tih te leh ven-himna chungchanga ruahmanna awmte (security arrangement) te a enfiah a. Booth Level Officer (BLO) te a kawm nghal bawk a ni.


Serchhip DC David Lalthantluanga chuan Lok Sabha Inthlanpui hmachhawn tura inpuah-chahna kawngah kum upa te, rualbanlo wheelchair hman ngai te tana awlsamna siamsak chu ngaih pawimawh a tul thu a sawi a. Mipui mimir tan pawh vote thlak tura rei tak intlar ngai lo tur leh hahdam zawka vote an thlak theih nan rua-hmanna siam turin BLO te a hriattir a. Hmaih palh awm lo tura uluk leh fel fai taka inbuatsaih tura chahin, mamawh an neih leh harsatna an neih chuan District thuneitute hnena thlen turin a hrilh a ni.

Nimin-a heng khaw hrang hrang a tlawhna ah hian District Bawrhsap hi Serchhip DRDO Project Director HD. Lalpekmawia leh Official dang ten an tawiawm a, Vawiin hian Thinglian, Hmunzawl leh Keitum te a tlawh leh ang.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man