Lok Sabha Inthlan-a Congress Candidate-ah Serchhip SP hlui Lalbiakzama ruat a ni

Mizoram Pradesh Congress Committee (MPCC) chuan kumin a Lok Sabha inthlanpui lo awm turah an Party Candidate tur chu MPS atanga Pension ta, Lalbiakzama a nih thu nimin khan an puang.

MPCC hian nimin khan Aizawl-a Congress Bhavan-ah Lok Sabha Inthlanpui a an Party Candidate tur hi an puang a, he hunah hian an party President Lal Thanzara chuan an Candidate tur hi puangin, MNF nen Candidate intawm nei tura inbiakna a awm tawhnaa BJP bei tur ber an nih avang leh MNF-in NEDA an thawhpuina an tihtawp theih loh vangin an thawkdun thei ta lo tih a sawi.

Lalbiakzama chuan MPCC in Candidate-a an sawm chu a phu lo leh a beisei loh a nih thu he hunah hian sawiin, hetianga a chunga mawhphurhna a tlak takah chuan theihtawp a chhuah tur thu a sawi a. India ramah tun anga dinhmun derthawnga kan awm hi ala awm ngai lo nia sawiin, hemi avang hian amah pui turin Mizoram mipuite chu a sawm bawk a ni.

Lalbiakzama MPS (Rtd) hi March 1, 1960 khan Aizawl Venghlui ah puangin Mizoram buai avangin Silchar lama hun engemaw chen a awm hnuah kum 1979 khan Mizoram-ah a rawn chuang chhuak leh a. Kum 1988 kumtir-ah Mizoram Police Service (MPS) zawmin Mizoram hmun hrang hrangah a awm kual tawh a, kum 1998 July thla khan UN Mission-in Bosnia-ah a kal a, Bosnia khawpuiber dawttu Tuzla-ah Police Station pakhat enkawltu hna a chelh a. Hemi hnu hian Mizoram-ah rawn chhuak lehin kum 2002 khan UN Mission-in Kosovo-ah a kal leh bawk.

Hemi hnu hian Mizoram-ah rawn chhuak lehin kum 2004-ah Lawng-tlai SP niin kum 2005 khan Serchhip-ah SP hna a rawn chelh leh a, hemi hnu hian hna hrang hrang chelhin kum 2012 June thlaah Home Department-ah Joint Secretary hna a chelh a, Home Department-ah hian a pension thleng awmin Secretary thlengin a kaisang a, Mizoram Police Service atanga Home Secretary ni hmasa ber a ni bawk a. A nupui Laldingliani nen fapa pathum leh fanu pakhatneiin Aizawl Model Veng-ah an cheng mek a ni.

Lok Sabha inthlan lo awm turah hian tun thla ni 27 thleng chuh tura hming pekluh theih niin Mizoram-a rorellai ZPM chuan Richie Vanlalhmangaiha chu an Candidate tur a nih thu an lo puang tawh a, PC Party-in Rita Malsawmi chu an Candidate a nih tur thu puang tawhin tunhnaia Congress atanga bang ta Lal Hriatrenga Chhangte chuan Independent in he inthlanna hi chuh a tum nia thudawn a ni a. MNF Party chuan Vawiin hian an Candidate tur puangin BJP chuan Central lamin an puang dawn niin an sawi a ni.