Vote tla a that theih dan tur ngaihtuah a ni

Chief Electoral Officer (CEO), Mizoram Madhup Vyas IAS hovin Ningani khan a Pisa-ah Lok Sabha MP thlan huna vote tla a that theihna tur ngaihtuahin sawrkar hotu pawimawh an thukhawm.

He thutkhawm ah hian Chief Electoral Officer chuan inthlanpui awm apiangin MLA inthlan aiin Lok Sabha MP thlanna ah vote tla a chhe ziah tih sawiin, MLA inthlanpui ah India ramah pawh vote tlak thatna ber an nih thin laiin a hnu lawk thla 4 awrh ah Lok Sabha MP thlan lehnghal niin MLA inthlanpuia vote tla a phak loh bakah Lok Sabha MP thlan hnuhnung ber kum 2019-ah phei chuan national average-a vote tla pawh kan phak loh thu a sawi bawk.

He thutkhawm ah hian mipuite hnena vote thlak tura zirtirna kalpui dan tur chi hrang hrang ngaihtuah niin kalphung pangngai lo deuh, thil thar chhawpchhuah chi hrang hrang te sawiho a ni a. A bik takin thalaite leh a vawikhatna atana vote thlak tur (first time voters) te hnena hmalak dan tur uluk taka sawi a ni a, Micro-Level ah tanlak a ngai hle tih sawi niin, School Education Department, Higher & Technical Education Department leh Sports & Youth Services Department kaltlanga hmalak dan chi hrang hrang duan a ni.