MHIP Sub-Hqrs. Serchhip Conference vawi 12-na hmangin Vawiin ah Silver Jubilee lawm a ni ang

Mizo Hmeichhe Insuihkhawm Pawl (MHIP) Sub-Hqrs. Serchhip Conference vawi 12-na chu nimin khan New Serchhip YMA Hall-ah neih niin Vawiin hian Serchhip Auditorium-ah MHIP Sub-Hqrs. Serchhip Silver Jubilee lawmna neih chhunzawm a ni ang.
MHIP Sub-Hqrs. Serchhip Conference Vawi 12-na nimin-a New Serchhip YMA Hall-a neih ah hian chawhma lamah an President Lianthangi kaihhruaina hnuaiah Rorel Inkhawm neih a ni a, Agenda hrang hrang lut zingah ‘Mizo hnam chimrala kan awm loh nan pianpun inzirtirna tura hmalak nise’ tih chu an sawiho hnuah Hqrs. a kal zel turin an pawm a, ‘Puipunna ah Hmeichhia ten puan bih uar tura inzirtir nise’ tih pawh Hqrs. a kal zel turin an pawm bawk. Heng bakah hian ‘Inneihna ah Puanchei bih tura hmalak ni rawh se’ tih pawh pawmin MHIP Sub-Hqrs. Serchhip Office hmun nghet nei tura an hmalakna chu chhunzawm zel nise an ti a, kum 2024 Budget atan Rs. 214,600/- chu an pawm bawk a ni.

He hunah hian MHIP Sub-Hqrs. Serchhip-a Secretary Angeli Marhmingliani chuan kum 2022-2024 chhunga an hmalakna hrang hrang a tarlang a, MHIP Sub-Hqrs. Serchhip hi kum 1999-a din niin an hnuaiah hian MHIP Block 3- Tawitlang Block; Ramlai Block leh East Lungdar Block te a awm a, Joint MHIP chu khaw 4- Bungtlang, Thenzawl, East Lungdar leh North Vanlaiphai-ah te a ding bawk a. MHIP Sub-Hqrs. Serchhip hnuaiah hian MHIP Branch 82 awmin Member 21,106 an awm mek bawk a ni.

MHIP Sub-Hqrs. Serchhip Conference vawi 12-na nimin-a hman ah hian chawhnu lamah kum 2024-2026 chhunga MHIP Sub-Hqrs. Serchhip hruaitu tur thlanna neiin President-ah Lianthangi (S. Dinthar Branch); Vice President-ah Lalhmunsangi (Bukpui Branch); Secretary- Angeli Marhmingliani (P&E Veng Branch); Asst. Secretary-ah H. Lalhlimpuii (IOC Veng Branch); Treasurer-ah V. Lalngilneii (S. Hmar Veng Branch) leh Fin. Secretary-ah H. Rosangi (Saron Branch) te thlantlin an ni.

MHIP Sub-Hqrs. Serchhip hian Vawiin hian an kum 25-na, Silver Jubilee lawmna chu Serchhip Auditorium-ah an hmang zui dawn a, he hun hi Serchhip DIPRO Lalnunmawii chuan khuallian nia a hmanpui dawn bakah MHIP General Hqrs. a General Secretary Lalliani chuan khual zahawm niin a hmanpui bawk anga, chawhnu lamah Variety programme hman chhunzawm tur a ni ang.

Comments

Popular News (Last 30 Days)

Vawiin-ah HSSLC Exam result

LPG man bithliah thar