Dan lova sumdawn titawp turin Kuhva chingtu in ngen

Vairengte leh a chhehvela Kuhva chingtuten dan lova Kuhva ro hmanga sumdawng thinte chu Mizo leh Mizo inkar-a inhmuh thiamlohna a thlen hmaa an thil tih thin sim turin an ngen.

Vairengte a Kuhva chingtu Cooperative Society chuan Zirtawpni kalta khan Vairengte SDO (Civil) Victor Lalawmpuia leh SDPO Lallunghnema te kaihhruai in Vairengte-a Burma Kuhva ro dahkhawlna Kudam an enfiah a, Kudam 51 an enfiahna atangin heng Kudam hrang hrangah hian kuhva ro thahnem tak ala awm tih an finfiah tih an sawi a. Kumdang ah chuan January leh February thla velah an kuhva thar te chu an hralh deuh vek tawh thin tih sawiin, kumin ah erawh Myanmar atanga dan lova kuhva ro tawlhruk awm thin avangin an Kuhva thar leitu tur ten Assam lama lakluhna kawngah harsatna an tawh thin bakah sum tam tak an chawibelh thin avangin an lei ngam ta lo tih an sawi a ni.

Hetianga dan lova Kuhva tawlh thin te avanga harsatna an tawh mek hi a reh theih nan Mizoram sawrkar duh angin dan lova sumdawng te chu an hmalakna tawpsan turin an ngen a, an ngenna an ngai pawimawh lo a nih chuan an thiam ang anga hma an lak tur thu an sawi a ni.