MRB Champhai-a sum puk tir CBI chhui tir a ni dawn

Mizoram Rural Bank (MRB) Chairman in a ngenna angin MRB Champhai Branch-a sum puktir dana thil diklo tak awm ni a hriat chu Central Bureau of Investigations (CBI) kuta hlan a ni.

Thudawn danin Champhai MRB Branch atang hian KCC Account ami chu mi 1,290-te Bank Account hmangin cheng vbc. 20.64 chuang chu khatihlai a Branch Manager khan kum 2021 chho khan a puktir a. Heta pawisa pukte hi Savings Bank Account pakhatah chhunluh a ni tih hriatchhuah a ni a. He Savings Bank Account neitute hi Lucas Thangmangliana, PS. Zatluanga, T. Paulamthanga, Tuangzapauva leh Jacob Thanglianchina te an nih thu MRB hotute chuan an sawi a ni.

Hemi chungchang ah hian kum 2022 August thla bul lamah khan Champhai Police Station-ah FIR thehluh a ni a. Police lamin charge sheet thehlut tawh mah se, Bank danah Bank sum chingpen chu CBI chhuitir tur tih a awm avangin MRB Chairman ngenna angin kumin February thla laihawl vel khan Lokayukta chuan CBI kutah he thil chhui hna hi a pe ta a. CBI lam atang erawh chuan engmah hriat a la ni lo thung.

Heta loan an pekchhuah hi rulh a awm lo reng reng ni a sawi a ni a. Inbumna thil a nih bakah MRB hian an hloh nasa hle a. Pawisa luh khawmna Savings Bank account neitu zing ami pakhat Lucas Thangmangliana hi mihring sam (hair) hmanga dik lo taka sumdawng zinga telah puh a ni a. Champhai-a a In pawh Enforcement Directorate a thawkte'n an dap a, mahse Lucas Thangmangliana hi Myanmar lamah a lo bibo hman nia thu dawn a ni. Enforcement Directorate hian Hyderabad atanga Mizoram kaltlanga China a sam hmanga sumdawnna-ah hian Hyderabad a company thenkhat bakah St. Mary’s Gem Industries leh Sun Moon Human Hair Champhai leh Thari Enterprises, Aizawl-te pawh an dap a ni.