Mizoram-ah leihnuai tui mcm 200 vel awmin lachhuak turin ruahmanna mumal neih tul ti

Mizoram in leihnuai tui a ngah thawkhat hle a, Central Ground Water Board leh Mizoram PHE Department chhut danin leihnuai tui (ground water) hi million cubic meter 200 vel awma ngaih a ni a. Hetihlai hian ruahmanna mumal awm lova leihnuai tui hi lakchhuah a nih chuan a hlauhawm thei tih mi thiamte chuan an sawi.

State Ground Water Authority-a Secretary Er. F. Liantluanga chua tunhnaiah mimal leh pawl thenkhat in an duhna hmun hmunah phalna pawh la hmasa lem lovin tuihna an verh tih a sawi a. Heng leihnuai tui awmte hi uluk taka lakchhuah a, awmze nei taka hman a pawimawh tih sawiin, leihnuai tui lakchhuah leh hman dan chungchangah PHE-in dan a duang mek a, chu chu mipuiten nghak hram hram se a duh tih a sawi.

Er. R.Lalruatkima, Hydrogeologist pawhin duhna hmun hmuna tui verh ringawt chu a him lo a sawi a. “Leihnuaia tui awmte hi kan thal kang a nih chuan kan tuikhur leh luite hi a kang chat thei a. Hei mai bakah tui hi kan thal kang a nih chuan lei che leh min a awm thei bawk a, dan hnuaiah awmze nei taka lakchhuah a pawimawh a ni,” a ti a. Mizoram chuan phai ramte angin lui lian a nei lo a, tuikhur leh lui te tuite chu kan innghahna awmchhun a ni tih a sawi bawk.

PHE thawktute sawi danin Mizoram lei hnuaia tui awm dan chu kum 20 kalta vel atang khan kumtin an teh tawh tih sawiin, hmun hniam lai deuh Zawlnuam, Thenzawl leh hmun ruam lai deuhah chuan a tam a. Hetihlai hian tlang sang deuhah pawh a awm tho niin an sawi a. Mizoram lei hnuaia tui awmte chu kum 50/60 kalta vel atanga inkhawl tawh an ni tih sawiin, a inkhawl muang hle niin an sawi bawk a. Heng tui inkhawlte hi thenkhatten an duhna hmun hmuna lei verhin an pump chhuak a, hralh sum atante an hmang nia sawiin, ruahtui hi a luh belh lo anih chuan tui awm sa hi a zo duak thei niin an sawi bawk.

Lei hnuai tui chu a inkhawl (recharge) muang tih pawh sawiin, thing leh mau tihchereu zel avang te, ram a awih bawk sia avangte-in lei chhunga ruahtui hip luttu tur an tlem telh telh a, hei vang hian lei chhunga ruah tui lut pawh a tlem telh telh niin an sawi a. Ruahtui chu a pawimawh hle tih sawiin, leichhunga tui awm hi ruahtui in a pawlh loh chuan mineral a tam thin avangin mihring tan pawh a hlauhawm thei niin an sawi bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man