Police ten Serchhip-a hmun 2-ah Heroin an man

Serchhip Police te chuan nizan hmasa khan Serchhip khawpui chhung hmun hnih ah Heroin nia hriat manin hemi kaihhnawih ah hian mi pathum man an ni bawk.
Serchhip Police te hnen atanga thu kan dawn danin niminpiah tlai hma deuh, dar 5:00 velah khan Remnalalhmuaki (30), Ser-chhip Bazar Veng nia insawi leh Lalhmangaih-sangi (28), Serchhip Vengchung nia insawi te kut atangin Serchhip Police te hian Heroin nia hriat Hawng khat an man a, an pahnih hian manin thubuai siam sak nghal an ni a, damdawi an man hi gram 12.90 a rit niin tualchhunga hralhna rate in Rs. 38,700/- man vel nia chhut a ni.

Hemi hnu nizan hmasa dar 7:15 vel khan Serchhip Police te hian Serchhip Chhim Veng-ah Heroin nia hriat Hawng khat man lehin a neitu nia hriat Hmangaihsanga (27), Serchhip P&E Veng nia insawi pawh man nghal a ni a, ruihhlo an man hi gram 11.82-a rit niin tualchhunga an hralhna rate anga chhutin Rs. 35,460/- man vel nia chhut a ni a, a neitu a puh hi thubuai siam sak nghal a ni bawk.