Kawng siamtute Motor chesual ah hnamdang thi

National Highway-54 laihzauh leh siamthat hna thawk mektu BIPL Company hnuaia thawk Truck pakhat chu nizan hmasa khan Serchhip leh Thenzawl inkarah chesualin he Motor khalhtu chu chetsualna hmunah hian a boral.
Keitum leh Hnahthial inkar-a NH-54 siamthat hna thawk mektu BIPL Company hian Serchhip leh Then-zawl inkarah hian an hmanraw mamawh te an la thin a, helai hmun pan tura Truck pakhat kal hi nizan hmasa khan Serchhip leh Thenzawl inkar, Mualvawm kawr bulah chesualin kawngthlang ah a tlanliam a, kawngthlang ah meter 60 vel lumin a thlang-a kawr-ah a tang a ni. He Motor ah hian a khalhtu Jabir Hussain Laskar (49), Nag-dirgram, Kabuganj chiah chuangin chetsualna hmunah hian a thi nghal niin a lang a, a lu ah hliam a tuar niin a lang a ni.

He lirthei chetsual hun tak hi hriat a ni lo a, nimin zing-a Serchhip atanga Mat phai-a Balu phur tura kal te chuan kawngsir lo pe sun chu hmuin lirthei chesual awm palh hnuhma ni theia an hriat avangin an enfiah hnuah lirthei chesual hi hriat a ni ta tih Serchhip Darnam Branch YMA hruaitute chuan an sawi a. Police te chuan a hmunah thil thlen dan te enfiah nghalin Driver ruang hi Postmortem a nih hnuah nimin vek khan an khaw lamah lak a ni bawk.