Serchhip-ah World Water Day hman a ni
PHE Serchhip WATSAN Division bultuma New Serchhip YMA Hall-a hun hman ah hian Serchhip Addl. DC James Lalnithanga chuan kumin-a World Water Day thupui 'Inrem nan Tui' (Water for Peace) tih chu a thûk hle tih sawiin, kan tui hna a kâm chhoh zel avangin khawvel mithiamten indopui a lo chhuah leh chuan tui inchuhna vang a nih an rin thu an sawi thu te a sawi a, tun dinhmunah chuan Serchhip chu kan vannei a, tui ah harsatna em em kan la neih loh laiin Mizoram khawpui dangte tui tlanlai a kang thu hriat tur a awm fo tawh tih a sawi a, hei vang hian tui humhalh chu a tul tawh hle tih a sawi a, mihring hriselna atana tui tangkainate sawiin, hriselna atana hman tum turin kalkhawmte a chah a ni.
He hun kaihruaitu PHE Serchhip-a Sr. EE, Er. Isaac Lalchhuanmawia chuan World Water Day lo chhuah dan leh tui harsatna vanga ram leh ram bakah Mizorama khaw thenkhatte pawhin innghirnghona an lo neih phah fo tawh thu sawiin, Serchhip tui tlan ber Tuikum lui tui chu data an lakkhawm atangin kumtin a tlem zel tih a sawi a, an chhût danin tuna Tuikum lui tui hian kâm lam pan lo se chuan kum 2050-ah pawh Serchhip mipuite mamawh khawp la phuhru thei dawn mah se a dinhmun zel tur hriat a ni lo tih a sawi a, Tuikum tui in kâm lam a pan zel avangin tuihna humhalh lama tan lak a tul thu a sawi bawk.
Nimin-a he hun hman ah hian Er. HL Thang-vuta, SDO, PHED, Tlungvel chuan kumina World Water Day thupui hmangin zirtirna a pe a, Serchhip Sub-Hqrs. YMA President Kawl-thuama chuan thu a sawi bawk. He hunah hian World Water Day puala intihsiakna hrang hrang lawmman sem niin Tuihnar humhalh kawnga WATSAN Committee thawk tha ber lawmman chu Chhuan-thar Tlangnuam, Baktawng-in an dawng a ni.
Comments
Post a Comment