MHIP Sub-Hqrs. Serchhip Silver Jubilee lawmna Serchhip DIPRO hovin neih a ni
MHIP Sub-Hqrs. Serchhip Silver Jubilee lawmna Serchhip Auditorium-a neih ah hian Serchhip District Information & Public Relation Officer leh I&PR Department-a Deputy Director Lalnunmawii chuan he huna tel MHIP Member te chu Silver Jubille lawmpuina chibai bukin duh leh tum, hlenchhuah duh thuhmun nei ten Pawl an din thin tih sawiin, Mizo Hmeichhia te pawhin kawng hrang hranga hma an lo sawn theihna tura tum thuhmun nei ten July 6, 1974 khan MHIP hi an lo din ta tih a sawi a. Mimal tana thil tih harsa ah tanruala mi tam zawk ten kan beih tlan chuan sutkian theih a ni thin tih sawiin, MHIP pawhin kawng hrang hrangah hma a lo lak tawh thin thu a sawi a. Tunlai khawvel danglam chho zelah Mizo hmeichhiate chu sumdawnna leh eizawnna kawng hrang hrangah thawktu ber te an lo nih chho tak thute, kawng tin rengah nasa taka hma an sawn thute sawiin, an chhungkua leh fate tan, an Veng leh an ram tana malsawmna ni zel turin Jubilee hmangtute a sawm a. Mizo mipa te chu chhungkaw khaidingtu leh eizawngtu ni tura ngaih an nih laiin Mizo mipa te zingah hnathawh mumal nei lo, awm mai mai kan tam ta chu veiawm a tih thu a sawi bawk.
Systematic Voters’ Education and Electoral Participation (SVEEP)-a Nodal Officer ni bawk Lalnunmawii chuan Lok Sabha Inthlanpui lo awm leh turah MHIP member zawng zawngte chu uar taka vote thlak leh vek turin a sawm bawk a. Serchhip District chu ziak leh chhiar thiam tamna leh Mizoram District dangte zingah pawh Vote tlak that na ber a nih thin thu sawiin, MLA Inthlanpui neih zawh takah Serchhip Sub-Headquarters MHIP leh District Election Officer (DEO) Office thawhhona avangin District chhunga khaw tinah Hmeichhe voters te chochhuah an nih dan te a sawi a. MHIP Branch tin te chu Lok Sabha MP Inthlanna lo awm leh turah pawh uar taka Vote thlak leh tur leh an veng leh khua theuha an member pui leh midangte zirtirtu ni turin a chah a. SVEEP hnuaia District Election Office buatsaih ‘Lok Sabha Inthlanpuia Vote thlak ngei tura intiamkamna’ Signature Campaign-ah pawh MHIP member a tam thei ang ber te hming sign turin a sawm bawk a ni.
MHIP Sub-Hqrs. Serchhip Silver Jubilee lawmna hun hi an President Lianthangi chuan kaihruaiin kum 2 kalta chhunga an Member boral mi 290 te sunna hun hman a ni a, MHIP Thuthlung sawirualna hun hman a nih bakah MHIP General Hqrs, Serchhip Sub-Hqrs. YMA leh MUP bakah Joint VC aiawhte atangin thusawi tawi ngaihthlak a ni a, kum 25 chhung chawl lo a MHIP hruaitu lo ni tawh mi 15 te hnenah Chawimawina thuziak hlan a ni bawk.
Comments
Post a Comment