MJA General Conference vawi 50-na hman a ni

Mizoram Journalists’ Association (MJA) General Conference vawi 50-na chu niminpiah khan Aizawl Information & Public Relations (I&PR) Office Building-a Lianchhiari Run-ah neih a ni.

MJA General Conference hmanpuitu I&PR Addl. Secretary Betsy Zothanpari Sailo chuan chanchinbumite chu mipuite thuthar hriatna hnar ber leh mipui sukthlek kaihruai theitu an nih avangin an hna a pawimawh em em tih a sawi a, tan bik nei loa lai taka thawh leh chhui zuia ngai lam chanchin thar ngaihven peih turin a chah a. Thuchhuah turah fimkhur a ngai tih sawiin, mahni hamthatna um ringawt lova mahni hna ngai pawimawh reng tur te, fimkhur leh uluk taka thu chhuah thin turin a chah bawk.

MJA General Conference hi hun thum-ah thenin Hun khatna-ah hian Report hrang hrang ngaihthlak a nih bakah an Member boral mi pahnih sunna hun hman a ni a. Hun hnihna ah kum hnih chhunga MJA General Hqrs. hruaitu thar thlan a ni a. President atan President nilai C. Lalrambuatsaiha thlan leh niin Vice President-ah C. Lalhmachhuana leh Treasurer-ah Lalrinmawia Sailo te thlan an ni a; Executive Member mi 11 thlanchhuah an ni bawk. Hun thumna ah hian Rorelna neiin hun an hmang bawk a ni.

Mizoram pumah MJA member hi mi 192 an awm mek a, Aizawl District-ah 91 awmin Lunglei District-ah 20; Siaha District-ah 12; Champhai District-ah 17; Kolasib District-ah 14, Serchhip District-ah 14, Lawngtlai District-ah 10, Mamit District-ah 8 leh Hnahthial District-ah member 6 an awm a. I&PR Department in Mizoram Press Accreditation list-a siamah Accredited Journalist mi 142 an awm mek bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man