MINECO-ah Biometric attendance hmangin Department dangah pawh hman zel tum a ni bawk

Sawrkar hnathawkte Office kai chin hriatna tur, Biometric Attendance chu Mizoram New Capital Complex (MINECO)-ah hman a ni tawh tih Chief Minister Lalduhoma chuan sawiin, sawrkar Department pisa hrang hrangah dah belh a nih dawn thu a sawi bawk.

Sawrkar Pisa hrang hranga Biometric Attendance kalpui tur chungchang hi Chief Minister Lalduhoma chuan Social Media lama a Account kaltlanga tarlangin, Lailen nen thawkdunin Mizoram sawrkar chuan Aizawl Smart City Ltd. kaltlangin Biometrics Attendance chu tun thla ni 15 atangin MINECO-ah hman tan a nih tawh thu a sawi a. Biometrics khawl-ah chuan hmel leh kutzia hmangin Attendance dahluh theih a ni a, Office-a thawkte kal hun leh haw hun a inchhinchhiah anga, chu chu Chief Minister thlengin an lo en thei dawn tih a sawi a. MINECO-ah hian CCTV 70 leh Biometric Device 28 dah tawh a ni tih sawiin, Mizoram sawrkar Department Office hrang hrangah dah belh zel a ni dawn tih a sawi bawk.

Biometric hmanga Office kal leh haw hun endik chungchangah hian Chief Secretary, Dr. Renu Sharma-i chuan Zirtawpni khan thuchhuah siamin he hmalakna hi uluk taka enzui a ni dawn tih a tarlang a. Department hrang hranga thuneituten Nodal Officer pakhat theuh ruatin hei hian kartin Department hotu hnenah an Department hnuaia Staff te kal dan a thehlut thin dawn a, Superintendent te pawh an hnuaia thawk Group B, C leh D te endik turin Checking Officer an ni dawn tih sawiin, Under Sercretary hnenah ni tin pisa kal dan an thehlut dawn tih a sawi a. Pisa hun laia hmun danga chhuak te chu tha taka chhinchhiah an ni dawn a, Pisa vawi thum aia tam tlai te chu Casual Leave (CL) ni khat leh a chanve ziahsak an ni dawn a, Department tina hotute chu tha taka an hnuaia thawk te enkawl turin a ti bawk.

Chief Minister Lalduhoma chuan Assembly Session neih zawh taka thu a sawinaah Office kai chhinchhiahna an hman hma leh hman hnuah Office kai dan a danglam tih a lo sawi tawh a. Biometric Attendance chu District Level thlenga hman theih tura ruahmanna kalpui mek a ni tih sawiin, sum sen a hautak hle a, sum sen vak ngai lo chi Department thenkhatin an ngaihtuah chhuah chu an pawm tho a nih thu a sawi a. Education Department-in QR Code hmangin kal chhin-chhiahna siama School zirtirtu kal te chhinchhiahna atana School hung chhung china ‘Geo-Fencing’ an hman pawh a tha hle a ni, a ti.