MP (LS) Inthlanpui neih tur atan Political Party ten Campaign beihpui an thlak chho tan mek

Mizoram Lok Sabha Inthlanpui neih tur atan Political party hrang hrangte chuan ngawrh takin Campaign an nei chho tan mek.

Mizoram Pradesh Congress Committee (MPCC) chuan Ningani khan Lok Sabha MP inthlan Campaign beihpui thlak tanin Campaign beihpui hawnna Aizawl Vanapa Hall-a neih ah MPCC Official Candidate Lalbiakzama chuan, kum 1947-a zalenna neia India a lo pian khan India hma hun chu kawng hnihah a innghat a; pakhatin Sakhaw pakhat vulh len an duh laiin Hnam Pa tia sawi tak, Mahatma Gandhi-a kaihhruai chuan India ramchhunga hnam chi hrang hrang, Sakhaw biak chi hrang hrang te him leh zalen taka an awm theih nan Danpui an lo duang ta zawk a ni, a ti a. An elpui BJP te thil tum ber chu Hindu Sakhaw vulh lena mi dang nek chep a nih thu sawiin, an theih ang angin India Danpui pawh sawi danglam zel an tum niin a sawi bawk. He hunah hian MPCC Campaign Chairman Lalnunmawia Chuaungo pawhin sawrkar laipuia BJP sawrkar paih thlak theih nan Mizo mipuiten theihtawp an chhuah a ngai tih sawiin BJP thawhpui sa MNF MP thlantlin a nih chuan zalenna humhim theih a ni dawn lova, ZPM pawh BJP thawhpui leh mai tur niin a sawi bawk.

Mizo National Front (MNF) Tuichang North Block pawhin Ningani khan Khawzawl Vengthar-a Mizo Hnam Run-ah Lok Sabha Inthlanpui Campaign beihpui thlak tanna neiin MNF Gen. Hqrs. President Zoramthanga chuan he hun hi a hmanpui a, Inthlanpuiah tling ve ngei tura an inngaih laia an tling zo ta lo chu tu thiamloh mah a nih loh thu sawiin, Pathian remruat ve reng a ni, a ti a. MP inthlan hmachhawn mekah MNF-in NDA a zawm chu mi tam takin beih nan an hman leh a rin thu sawiin, NDA-a an tel chung pawhin Mizoram tana tha lo BJP Policy te chu na taka an do zel zawk avangin NDA atanga chhuak tura duh ber tute chu BJP an ni zawk niin a sawi a. NDA rorelna sanga Mizo hnam tana tha lo thutchilha bei turin MNF chuan NDA a chhuahsan duh lo zawk nia sawiin, NDA-ah hian Mizoram leh hnam humhalh nan an kal zel tur thu a sawi a. Lok Sabha MP Candidate K. Vanlalvena chu enchhin tawh sa, a tha tawk a ni tih hriat tawh sa a nih avangin mipui tih tur chu vote mai a nih thu a sawi bawk.

Hetihlai hian PC Party chuan thuchhuah siamin tunhnaia YouTube Channel ten MP Candidate an kawm tawh te zingah PC Party Candidate Rita Malsawmi’n mipuite ngaihven hlawh ber dinhmun a chang thei chu lawmawm an tih thu leh an chhuang takzet tih an sawi a. Mizo mipuite'n Party bil ruihchilhna rilru hnualsuata, neutral taka kan democratic right kan hmang thiam chho ta chu lawmawm an tih thu sawiin, tun tum MP inthlanpui lo awm turah pawh hian Party feeling te dah tha a, a mimal taka an ngainat leh an duh Rita Malsawmi chu lo vote vek turin Zoram mipuite an ngen tih an tarlang bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar