Govt. Serchhip College-ah International Day of Forests pualin Seminar neih a ni
EF&CC Department leh Govt. Serchhip College-a Dept. of Botany leh Eco-Club te buatsaiha ‘Seminar in Observance of International Day of Forests’ hi Govt. Serchhip College-a HD. Rosanga Multipurpose Hall-ah neih niin Dr. Lalremsiami Hrahsel, Asst.Professor chuan a kaihruai a, he hun hmanpuitu Govt. Serchhip College Principal C. Laldintluanga chuan he huna kalkhawmte inlawmna thu sawiin, he ni an hman chhan te leh ramngaw humhalh a pawimawhna hrang hrangte a sawilang bawk a ni.
He hunah hian Rongura Hrahsel MFS (Rtd), IPVM National Awardee ni bawk chu Resource Person atan hman niin Mizoram-a kan leilung hausakna hlu ber chu kan ramngaw, nungcha leh biodiversity-te an nih thu leh heng kan ram rohlu te duat nachang kan hriat loh avangin kan tuar chho mek tih a sawi a. Mizoram pumah ‘Tui harsatna’ kan tawk chho mek tih sawiin, hei hi mitin in kan vei a, kan ramngaw neihsate humhalh bakah, ramngaw siam belh a pawimawh thu a sawi a. Ramngaw te loh theih loh a thil danga kan hmang duh a nih pawhin renchem taka kan hman a tul thu te a sawi bawk. Heng bakah hian Rongura Hrahsel chuan Wildlife Protection Act-1972 chungchangah mipuite hriattur pawimawhte tarlangin, Mizoram-ah nungchate chenna ramngaw a chereu nasat avang leh mihringten kan tihhlum nasat avangin an tlem tawh hle a, nasa zawka kan humhalh a pawi-mawh thu a tarlang bawk.
Mizoram biodiversity hi State pawn lam miten an hriain an hlut a; zirbingna leh thiamna sang zawk neih nan an hmang nasa a. Mizoram mipuite zawkin hlutna chang hre lovin kumtin kan tikang a, Silai, Bomb leh Tur hmanga ti chereu in a sa te kan ei bawk a. Hei hi a pawiin hemi kawnga hmasawn kan ngaih thu te tarlan a ni bawk.
Nimin-a Seminar ah hian Govt. Serchhip College-a zirlai leh zirtirtute bakah Thenzawl Forest Division Staff te, New Serchhip leh Chhiahtlang Village Forest Development Committee atangin mi engemawzat an tel a ni.
Comments
Post a Comment