Lok Sabha Inthlanpui-a Expenditure Observer-in Serchhip rawn tlawhin thawktute a kawm

Lok Sabha Inthlanpui neih tura Serchhip District tana Expenditure Observer Anita Ritesh-i chuan nimin khan Serchhip rawn thlengin tun tum Lok Sabha Inthlanpui neih tura Serchhip District-a Expenditure Monitoring Team hrang hranga Member te nen Serchhip DC Meeting Hall-ah an thukhawm.

He thutkhawm Serchhip District Election Officer David Lalthantluanga kaihhruai a neih ah hian DEO chuan inlawmna thu a sawi hnuah Anita Ritesh-i chuan Mizoram chu ram ralmuang a nih avangin inthlanna pawh felfai leh muanawm takin neih a ni thin tih a sawi a, kumin Lok Sabha inthlanah pawh harsatna engmah a awm loh a beisei thu sawiin, Inthlanna a duty tura ruat zawng zawngte chu an mawhphurhna tha taka hlenchhuak turin a sawm a, ram rawngbawlna pawimawh tak an thawk tih inhriaa Inthlanpui zawhfel hma chu tha thlah lova an hna theuh tlin taka thawk turin a sawm a ni. Election chhung hian englai pawhin biakpawh theiha a awm tur thu leh Expenditure Monitoring Team ten harsatna emaw, zawhna emaw an neih chuan a inhawn reng thu a sawi a. Chutiang bawkin inthlan zawhfel hma chu inthlan senso viltu tur leh endiktu tura ruat zawng zawng ten chawl lova, a tul hun apianga an tih turte ti a, an hna theuh te tha taka thawk tura beisei an nih thu a sawi bawk.

Expenditure Observer chuan Expenditure Monitoring Team hrang hrangte kawmin Election chhunga an tih tur leh mawhphurhna a sawipui a. Record mumal taka vawn a tulzia leh Candidate leh Political Party ten therhlo an sem lohna tura Election Commission of India (ECI)-in inkaih-hruaina a siam te uluk taka zawm a tulzia a sawi a. Team hrang hrang ten thawhhona tha tak an neih a tul thu a sawi bawk.

He thutkhawm ah hian Serchhip District Election Officer David Lalthantluanga bakah Addl. DC James Lalnithanga, Election Officer Gaston Vanlalhriatpuia leh SDO (Sadar) Rebecca Laldinmawii Hrahsel te telin Inthlanpui neih tura Election Expenditure Monitoring Nodal Officer te, Asst. Expenditure Observer te, Accounting Team te, MCMC Team te, Video Viewing Team te, Flying Squad Team leh Static Surveillance Team te an tel a. Heng Team hrang hrangte hi Observer chuan an hnathawh dan te zawtfiahin, Inthlan chhunga Campaign-na atana sum sen an endik dan chungchang leh therhlo sem a awm lohna tur hma an lak dan hrang hrangte an sawiho a ni.